“Keni 30 vite me PD”/ Batuta e Ramës në Malësinë e Madhe: Me Saliun bëni mitingje, me ne punën
Kryeministri Edi Rama ka inspektuar këtë të enjte kantierin e ndërtimit të ujësjellësit në Bashkinë e Malësisë së Madhe. Ai ishte i shoqëruar nga ministrja e Infrastrukturës, Belinda Balluku.
Gjatë fjalës së tij, kreu i qeverisë tha se më në fund kjo zonë do të zgjidhë problemin e furnizimit të ujit të pijshëm.
“Nga fundi i nëntorit, 24 orë pa ndërprerje në rubinetat e banorëve të krejt zonës urbane. Si në shumë zona të tjera të Shqipërisë, edhe këtu po ndërrohet komplet një rrjet ujësjellësi i degraduar i viteve ’70-të, të cilin po e zëvendëson sot një rrjet modern shpërndarës, që do të përmbushë të gjitha nevojat e banorëve dhe do të garantojë fundin e epokës së humbjeve të pafundme të ujit e të financave vendore.”
Ai nuk la pa përmendur edhe faktin që Malësia e Madhe ka mbështetur ish-kryeministrin Sali Berisha prej 30 vitesh.
“A do të përfundojë brenda nëntorit?! Ju të PD keni 30 vite që nuk u mërzitet më Saliun. Ju jeni të mirë, se i bëtë ca punë. Ky këtu ka qenë me Saliun (i drejtohet një prej pjesëtarëve të ekipit të punës). Me Saliun bën mitingjet, me në bënë punën.”, tha Rama.
