Kandidati i Bindjes Demokratike në Vlorë, Ardian Kollozi ka komentuar shpërthimet me tone të ashpra dhe pretendimet e presidentit Ilir Meta për skenare të manipulimit të votave nga ana e Rilindjes në këtë zonë. Ai i konsideroi përpjekje artificiale të kreut të shtetit për të nxitur tensione.
Në një lidhje direkte me edicionin qendror të lajmeve në “Vizion Plus”, Kollozi tha se Bindja Demokratike është një forcë e re politike që kërkon të përcaktojë ndryshimin.
Për Kollozin, asnjë nga dy kampet politike nuk do të arrijë të sigurojë 71 mandate në këto zgjedhje.
“Jemi duke zhvilluar një fushatë atipike. Bindja Demokratike në Vlorë e ka fituar betejën e saj. Jemi forca e vetme që është duke zhvilluar një betejë elektorale të natyrshme. Në mënyrë energjike, entuziaste dhe pozitive jemi duke kontaktuar të gjithë vlonjatët. Kemi katër grupe në terren që po shpërndan materialet zgjedhore…Tensionet në Vlorë i shoh si përpjekje artificiale, për ta përfshirë Vlorën në një betejë që nuk është e saj. E gjej të pavend përpjekjen e Presidentit për të dalë nga kostumi i të parit të shtetit, për t’u përfshirë direkt në fushatën elektorale, për të nxitur tensione dhe aq më pak ta zhvendosë betejën në Vlorë. Bindja Demokratike është një forcë e re politike që kërkon të përcaktojë ndryshimin. Shqipëria ka nevojë për një ndryshim të thellë që duhet të ndodhë sa më shpejt. Asnjë nga forcat e mëdha politike nuk e ka ofruar. BD ka vendosur të jetë një mundësi zgjedhje, pavarësisht vështirësive. Shqiptarët duan një ndryshim që duhet të imponohet nga forcat e reja. Këtë mision kemi marrë përsipër; duket një sfidë e vështirë, por do ta çojmë deri në fund. Ne jemi të bindur që nuk do të marrim 71 mandate, por jemi të sigurt që asnjë nga të dy kampet nuk do të sigurojnë 71 mandate. Ne do të përcaktojmë ndryshimin.”
