Numri i vrasjeve, por edhe i aksidenteve me pasoj vdekjen është në minimumin historik të këtyre 10 viteve të fundit. Kështu deklaroi Ministri i Brendshëm Fatmir Xhafaj gjatë prezantimit të buxhetit në Komisionin e Sigurisë Kombëtare. Pavarësisht uljes së numrit të viktimave nga aksidentet, ministri Xhafaj deklaroi se kjo është një çështje shqetësuese dhe se është në plan të merre masa për sa i përket kontrollit të rrugëve.
‘’Gjatë vitit që vjen kemi parashikuar përmes një sërë bashkëpunimesh që sigurojmë disa pajisje shtesë që kanë të bëjnë me Policinë Rrugore, në formën e donacioneve. Së pari rritjen e numrit të pikave të kontrollit me radar dhe së dyti informatizimi i të gjithë procesit të vendosjes së gjobave në mënyrë që ai të jetë një proces elektronik në momentin e konstatimit të gjobës dhe të mos gjobë që mbushet me dorë nga punonjësi i policisë. Dhe lidhja ndërmjet konstatimit ndalimit të makinës, prerjes së gjobës të jetë elektronike dhe lidhur me databazin qendror që të mos ketë asnjë mundësi abuzimi ose të minimizohet ndjeshëm abuzimi nga punonjësit e policisë rrugore, qoftë në rastin e aksidenteve, qoftë në rastin e identifikimit të shkeljeve të kodit rrugor’’,- tha Ministri i Brendshëm.
Ndërkohë në janar pritet të bëhet publik një projekt i ndihmuar nga qeveria austriake për informatizimin e të gjithë akseve të vendit dhe hotspoteve që kanë lidhje me krimin urban për vendosjen e radarëve dhe kamerave.
‘’I kam kërkuar qeverisë austriake që të vlerësoj një master plan informatizimin e të gjithave akseve rrugore të Republikë së Shqipërisë, si dhe hospoteve kryesore që ka në territor lidhur me krimin urban. Vendosjen e kamerave dhe radarëve elektronik në të gjitha akset rrugore të republikës së Shqipërisë, në zona të nxehta ku është e nevojshme të kontrollohen me vëzhgim elektronik më të shtuar për shkak të faktit se përbëjnë zona të nxehta të kriminalitetit si dhe një menaxhim me salla komandimi të gjithë këtij fluksi informacioni në të 12 drejtoritë e qarqeve. Ky projekt po punohet dhe në 1 janar të shpallet publikisht’’, – shtoi ndër të tjera Xhafaj.
