Kallëzimi penal ndaj Sali Berishës/ Prokuroria e Përgjithshme shpall moskompetencën
Grupi parlamentar i Partisë Socialiste ka depozituar një kallëzim penal ndaj ish-kryeministrit Sali Berisha pranë Prokurorisë së Përgjithshme për “përhapje informatash të rreme”.
Kjo Prokurori i ka dërguar një kërkesë Prokurorisë pranë Gjykatës së rrethit Tiranë ku thuhet se kjo çështje nuk është kompetencë e tyre.
“Pavarësisht se kjo padi është dorëzuar fizikisht në Prokurorinë e Përgjithshme, kompetenca nuk i takon kësaj zyre, por Prokurorisë pranë Gjykatës së rrethit Tiranë”, thuhet në dokument.
Ish kryeministri Berisha akuzohet për përhapjen e informatave apo njoftimeve të rreme. Sipas grupit të PS-së këto njoftime synojnë të përhapin panik, mosbesim tek stafet mjekesore dhe demoralizim.
Po ashtu, socialistët i bënë thirrje Partisë Demokratike të ndalojë menjëherë daljen në Tiranë dhe në bashki të tjera të vendit të përfaqësuesve të saj, “të instruktuar për të përhapur panik”.
