Ish-kryeministri i Britanisë së Madhe, Boris Johnson, ka deklaruar se Presidenti i Rusisë Vladimir Putin e kërcënoi me sulm me raketa në prag të pushtimit të Ukrainës 1 vit më parë. Detajet janë zbuluar në një dokumentar të BBC që hedh dritë mbi raportet e Putinit me liderët botërorë.
E duke u fokusuar më së shumti në agresionin ushtarak që Rusia ndërmori ndaj Ukrainës, Johnson ka patur një bisedë të gjatë telefonike me presidentin rus Putin në shkurt 2022, të cilin e paralajmëroi se lufta do të sillte dëme të mëdha në Europë dhe reagimin e pashmangshëm të ndërkombëtarëve. Por ish-kryeministri mori një kërcënim për sulm me raketa.
“Ai më kërcënoi në një moment dhe më tha: ‘Boris, nuk dua të të lëndoj, por me një raketë do të zgjaste vetëm 1 minutë’ ose diçka e tillë. Por mendoj se nga toni shumë i qetë që kishte, ai vetëm sa po luante me përpjekjet e mia për ta detyruar atë të negocionte”
Nëntë ditë pas kësaj telefonate, Sekretari i Mbrojtjes Ben Wallace udhëtoi drejt Moskës ku u takua me homologun e tij Sergei Lavrov.
Në dokumentarin e BBC “Putin kundër Perëndimit” zbulohet se Wallace u largua nga Moska me garancinë se Rusia nuk do ta pushtonte Ukrainën. Por sulmi ndodhi dhe më 24 shkurt mbushet një vit nga nisja e agresionit ndaj Ukrainës.
Ndërkohë lidhur me deklaratën e Boris Johnson reagoi edhe Kremlini zyrtar.
Zëdhënësi Dimitry Peskov u shpreh se rrëfimi i ish-kryeministrit nuk ishte aspak i vërtetë madje ai i kërkoi Johnson të zbulonte arsyet e kësaj gënjeshtre.
