Ish-kryeministri, Sali Berisha, akuzoi qeverinë se me tatimin mbi profesionet e lira, po largon nga Shqipëria ekspertët. Nga foltorja e parlamenti, Berisha deklaroi votën kundër deputetëve demokratë, duke theksuar se ky ligj godet shtresën e mesme.
“Sot ju po kaloni këtu në Parlament, një ligj ndëshkues për profesionet e lira. Një ligj, i cili krijon kushte të kalkulueshme për shpopullimin e Shqipërisë”, tha ai.
Por ministrja e financave, Delina Ibrahimaj, ka mbrojtur draftin e qeverisë, që sipas saj do të ofrojë barazi në taksim.
Tatimi i profesioneve të lira do të hyjë në fuqi nga 1 janari i vitit 2024. Kontabilistët, avokatët, noterët, mjekët etj do të tatohen me normat 15% , kur fitimi neto vjetor është deri në 14 milionë lekë dhe 23% kur fitimi neto në vit është mbi këtë shumë.
