“Tinka Kurti – Ditari i një bashkëshorti”, keshtu titullohet botimi më i ri që vjen nga autorja Anila Mema. Në fokus është jeta skenike e aktores së njohur shqiptare Tinka Kurti që përcillet mes kujtimeve dhe rrëfimeve të pathëna që datojnë deri në 40 vjet më parë.
Veçantia e këtij botimi qëndron në faktin se ai është ditar i mbajtur nga i shoqi i aktores “Nderi i Kombit”, Tinka Kurti.
Vetë Kurti vlerësoi e falenderoi secilin prej atyre që kontribuan për realizimin e botimit.
TINKA KURTI
ARTISTE E MADHE
“Ju falenderoj për këtë mrekulli që keni bërë! Nuk e kisha menduar kurrë se do të bënit një mrekulli kaq të madhe. Faleminderit kryetarit të Bashkisë, je shumë i mirë. Vazhdo të jesh i tillë dhe vetëm lumturi do të gjesh në jetë”.
Në promovimin e vepres, kryetari i Bashkisë së Tiranës, Erion Veliaj e cilësoi artisten e madhe Tinka Kurti si frymëzim për të gjithë brezat.
ERION VELIAJ
KRYETAR I BASHKISË TIRANË
“E ke ndriçuar atë rrugë! Sot je një grua e nderuar dhe përulemi me shumë respect para teje. Na ke frymëzuar të gjithëve – na ke treguar se njeriu edhe pse rrëzohet, ngrihet përsëri për të ecur përpara. Këmbëngulja jote është një frymëzim për gjithë brezin e ri të aktorëve. Të jam shumë mirënjohës për këtë”.
Ministrja e Kulturës, Elva Mrgariti, i dorëzoi artistes nje objekt simbolik në formën e një copëze shkëmbi.
ELVA MARGARITI
MINISTRE E KULTURËS
“Jemi bashkuar për të celebruar këtë moment për një njëri të veçantë, për një muzë për të gjithë ne. Tinka ka guxuar shumë! Vetëm një grua e guximshme mund ta bëjë këtë dhe jam vërtetë krenare që ti je shembull për gra e për vajza”.
Përmes këtij botimi, autorja Anila Mema premton se Tinka Kurti do të njihet në një tjetër dimension, me përjetime e ndjesi të thella dhe të pazbukuruara.
