Izraeli do të krijojë një agjenci të re speciale për të lehtësuar zhvendosjen “vullnetare” të palestinezëve nga Rripi i Gazës, konfirmoi sot një zëdhënëse e kryeministrit izraelit Benjamin Netanyahu.
Zëdhënësja tha se Këshilli i Sigurimit i Izraelit miratoi një propozim të Ministrit të Mbrojtjes, Israel Katz për të krijuar një agjenci përgjegjëse për “përgatitjen e largimit vullnetar të banorëve të Rripit të Gazës në vendet e treta në një mënyrë të sigurt dhe të kontrolluar”.
Shërbimi do të vendoset nën kontrollin e Ministrisë së Mbrojtjes, sipas saj.
Ky njoftim vjen pas propozimit të presidentit amerikan Donald Trump për të zhvendosur popullsinë e Gazës, më shumë se 2 milionë banorë, në vendet arabe dhe për ta kthyer enklavën bregdetare në “rivierën” e Lindjes së Mesme, diçka që fqinjët arabë të Izraelit e kanë refuzuar.
Palestinezët që dëshirojnë të largohen nga Rripi i rrethuar i Gazës do të jenë në gjendje ta bëjnë këtë “në përputhje me ligjin izraelit dhe ndërkombëtar dhe bazuar në vizionin e Presidentit të SHBA Donald Trump”, tha zyra e Netanyahut në një deklaratë.
Zëdhënësja e kryeministrit izraelit nuk specifikoi se cilat vende të treta do t’i pranonin palestinezët.
Organizata joqeveritare izraelite “Peace Now” e dënoi këtë veprim, duke e përshkruar atë si “një njollë të pashlyeshme mbi Izraelin”, në një postim në platformën X.
E ardhmja e afro 2.2 milionë banorëve të Gazës është veçanërisht e pasigurt pasi Izraeli nisi një valë të re sulmesh në enklavë javën e kaluar, duke çuar në mënyrë efektive në rënien e marrëveshjes së brishtë të armëpushimit që kishte arritur me Hamasin në janar.
Për më tepër, Jordania dënoi ashpër këto plane izraelite sot, me Ministrinë e Jashtme që denoncoi se ato përbëjnë zhvendosje të detyruar.
Çdo masë kundër pranisë së palestinezëve në tokën e tyre përbën një shkelje flagrante të ligjit ndërkombëtar, denoncoi ministria.
Jordania është një nga vendet që ka pritur numrin më të madh të refugjatëve për frymë, kryesisht palestinezë dhe sirianë.
Është vlerësuar se 30% deri në 40% e jordanezëve kanë rrënjë palestineze, duke përfshirë mbretëreshën Rania.
Jordania nënshkroi një marrëveshje paqeje me Izraelin në 1994./vizionplus.tv
