Zbardhet shkresa që është dërguar në zyrat e Frymës së Re Demokratike nga Bashkia Tiranë për të liruar ambientet që disponon kjo parti politike.
Në një njoftim për mediat, FRD e quan si provokim të rëndë që bie ndesh me ligjin mbi partitë politike.
Anëtarët e kësaj force refuzojnë të largohen nga zyrat, ndërsa kanë lajmëruar se do të qëndrojnë në ambientet e FRD gjithë natën.
Burime për Vizion Plus bëjnë me dije se në godinën në fjalë është ndërprerë energjia elektrike, e për pasojë anëtarët kanë zgjedhur qirinjtë për ndriçim.
Pas incidentit të regjistruar këtë të premte në selinë e partisë Fryma e Re Demokratike, Bashkia e Tiranës paralajmëroi se do të kallëzojë penalisht Presidentin e Republikës Ilir Meta dhe çdo person që ka penguar lirimin e ambienteve.
Në një reagim për mediat, bashkia ka sqaruar se FRD, së bashku me disa parti të tjera duhet të lirojnë zyrat shtetërore, pasi nuk plotësojnë kushtet ligjore dhe nuk kanë marrë në zgjedhjet e fundit 1% të votave.
