Presidenti i Italisë Sergio Mattarella ra dakord të shtunën të shërbejë një mandat të dytë, njoftuan politikanë të lartë të vendit. Vendimi i tij vjen pasi partitë nuk arritën të gjenin një kandidat të pranueshëm nga të gjitha palët, çka çoi në disa raunde votimi të dështuara në parlament, shoqëruar shpesh me tension.
Sergio Mattarella, 80 vjeç, e kishte përjashtuar mundësinë e qëndrimit në detyrë, por në një kohë kur stabiliteti politik i vendit po vihej në rrezik, u pa si e pamundur që ai t’i rezistonte trysnisë për të shërbyer për një mandat tjetër.
“Gatishmëria e Mattarella-s për të shërbyer një mandat të dytë tregon ndjenjën e tij të përgjegjësisë dhe lidhjen e tij me vendin dhe institucionet”, tha në një deklaratë Ministrja e Çështjeve Rajonale Mariastella Gelmini.
Ligjvënësit kryesore shkuan në presidencë për t’i kërkuar zoti Mattarella të qëndrojë në detyrë, pasi parlamenti nuk arriti të zgjidhte një kryetar të ri shteti të shtunën pas shtatë raundesh votimi. Vetë presidenti nuk ka bërë asnjë koment deri tani. Një burim nga një forcë politike tha se Kryeministri Mario Draghi, i cili nuk arriti të gjente mbështetje për ambiciet e tij për president, i telefonoi më herët zoti Mattarella dhe i kërkoi gjithashtu atij që të qëndronte në detyrë.
Kjo është hera e dytë radhazi që një presidenti i kërkohet të rinovojë mandatin e tij shtatëvjeçar. Në vitin 2013, pasi nuk arritën të gjenin një kandidat konsensual, udhëheqësit politikë iu drejtuan kreut të atëhershëm të shtetit, Giorgio Napolitano, i cili ishte pothuajse 90 vjeç.
Zoti Napolitano u detyrua ta pranonte, por u largua pas dy vitesh me zgjedhjen e një qeverie të re. Shumë komentues kanë thënë se me siguri zoti Mattarella do të bëjë të njëjtën gjë sapo ta mundësojë situata politike./VOA
