Ish-ministri i Shëndetësisë, Tritan Shehu dha alarmin këtë të mërkurë për vaksinën kineze, që po përdoret në Shqipëri.
Përmes një postimi në “Facebook”, ai tha se kjo vaksinë nuk është e sigurt, përsa kohë që as Organizata Botërore e Shëndetësisë nuk i ka dhënë dritën jeshile.
“Alarm e rrezik real nga vaksina kineze që po përdoret në Shqipëri! Edhe OBSH, që e ka nivelin e kërkesave të sigurisë shumë më të ulët se EMA apo FDA, nuk rekomandon përdorimin e vaksinës kineze, si të paefekeshme. Ndërsa Rama mburret se po vaksinon shqiptarët me këtë vaksinë me etiketa turqisht e datë skadence tashmë të kaluar prej javësh! Pra shqiptarët jo vetëm nuk po marrin diçka që u serviret vendeve e popujve të Evropës! Ata po marrin edhe më keq, po marrin atë çfarë OBSH nuk e rekomandon as për vendet e Afrikës, ku vlen së paku vetëm miratimi e rekomandimi i saj.”
Tritan Shehu përmend edhe një rrezik tjetër. Sipas tij, njerëzit mendojnë se janë të imunizuar nga COVID-19, përsa kohë kanë marrë vaksinën kineze. Por ai paralajmëroi se rrezikojmë një katastrofë epidemiologjike.
“Rreziku këtu qëndron përveç të tjerave edhe në faktin se duke u “ofruar” një vaksinë e tillë krejt e pasigurt në eficience (gjermanët e japin vetëm 30%), krijohet artificialisht ideja e “imunizimit të sigurisë”, që duke të çuar te ulja e masave mbrojtëse e kontrolluese për t’i rënë borive të “fitores”, siç po ndodh tek ne, mund të çojë pak më tej në një katastrofë epidemiologjike, e ngjashme me atë në Kili.”
