Ish-deputeti i Partisë Demokratike, Agron Shehaj ka darkuar me njerëz të artit e politikës italiane. Ai ka shpërndarë në rrjetin e tij social “Facebook” një foto, teksa shihet i ulur në një tryezë me tenorin e famshëm italian, Andrea Bocelli dhe politikanin Matteo Salvini.
Krahas fotos së publikuar, ai shkruan se të gjithë italianët duan një Shqipëri europiane. Sipas tij, ata janë të gatshëm që t’i vijnë në ndihmë popullit shqiptar në këpërcimin e vështirësive me të cilat detyrohen të ballafaqohen çdo ditë.
“Një darkë e këndshme me mikun tim Andrea Bocelli dhe njerëz të artit e politikës Italiane, përfshirë udhëheqësin e Lega Nord, Matteo Salvini. Të gjithë italianët duan një Shqipëri të mirëqenë dhe europiane. Ata janë të gatshëm të na ndihmojnë të këpërcejmë vështirësitë që hasim ditë pas dite. Mbi 700 mijë shqiptaro-italianë janë lidhja e përjetshme dhe e pazgjidhshme mes dy popujve tanë”, shkruan Shehaj.
