Përgjigja e Iranit për vrasjen e gjeneralit Kasem Suleimani nuk vonoi. Në shenjë hakmarrje Teherani sulmoi me 22 raketa 2 baza ushtarake amerikane në Irak. Autoritetet iraniane thonë se u vranë 80 terroristë amerikanë por kjo nuk është konfirmuar ende nga Pentagoni.
Udhëheqësi Suprem Ayatollah Ali Khamenei e konsideroi sulmin si një shuplakë për Ëashingtonin dhe paralajmëroi se hakmarrja ende nuk ka përfunduar.
AYATOLLAH ALI KHAMENEI
“Gjeneral Kasem Suleimani ra dëshmor pasi luftoi në mënyrë heroike kundër ISIS, Al Nusrah dhe Al Qaedas. Nëse nuk do të ishte për luftën e tij kundër terrorit, kryeqytetet europiane do të ishin në rrezik të madh tani. Përgjigja jonë përfundimtare për vrasjen e tij do të jetë largimi i të gjitha forcave amerikane nga rajoni.”
Ndërsa Presidenti Hassan Rouhani tha se SH.B.A. mund të ketë “prerë krahun” e Iranit duke vrarë komandantin Suleimani por Teherani do të kundërpërgjigjej duke I prerë këmbën Amerikës në rajon.
Ministri i Jashtëm Mohammad Javad Zarif e përshkroi sulmin me raketa si një masë proporcionale të marrë në vetëmbrojtje.
MOHAMMAD JAVAD ZARIF
MINISTER I JASHTEM I IRANIT
“Ne nuk kërkojmë përshkallëzim ose luftë, por do të mbrojmë veten kundër çdo agresioni. Amerika duhet ta ketë shumë të qartë se ne do të kundërpërgjigjemi shumë më ashpër se sa mund ta mendoni.”
Në bazat e sulmuara ajrore në Irakun perëndimor, Al-Asad dhe Erbil qëndrojnë edhe rreth 115 ushtarë gjermanë e 130 danezë, të gjithë të sigurt.
Më shumë se 5,000 trupa amerikane janë të pranishme në Irak së bashku me forcat e tjera të huaja si pjesë e një koalicioni që ka trajnuar dhe mbështetur forcat irakiane të sigurisë në luftën kundër ISIS.
Sulmi me raketa ndodhi në të njëjtën ore të ditës që Kasem Soleimani u vra më 3 janar pranë aeroportit ndërkombëtar në kryeqytetin e Irakut, Bagdad. Ai u varros një ditë më parë në qytetin e tij të lindjes, Kerman, ku më shumë se 40 persona humbën jetën pasi u shtypën nga turma.
