Nga kjo e hënë nisi në terren invetarizimi i dëmeve të shkaktuara nga zjarret në Gramsh.
Grupet e punës nga bashkitë dhe njësitë administrative do të verifikojnë dëmet e shkaktuara, si në banesa, edhe në bagëti si dhe në kullota. Ilir Bejtja, prefekti i qarkut të Elbasanit në një intervistë për Vizion Plus tha se Gramshi është dhe zona më me prioritet.
“Nga sot nisi invetarizimi i dëmeve. Do të shkojmë në çdo shtëpi. Kemi mobiluar të gjithë burimet njerëzore të bashkisë dhe çdo drejtorie tjetër për ti ardhur në ndihmë familjeve. Nuk ka një afat se kur mbaron invetarizimi, ai do të zgjasë deri sa të mbarojë evidentimi i çdo dëmi të shkaktuar”, tha prefekti i qarkut të Elbasanit.
Pas përfundimit të inventarizimit, do të nisë dëmshpërblimi. Ende nuk ka një udhëzim konkret se si do të kompensohen dëmet, me para në dorë apo me orenditë e dëmtuara. Sipas të dhënave në këtë qark janë rreth 40 banesa të djegura tërësisht.
“Aty ku është mundësia do të ndërtojnë shtëpinë e re. Ndërsa aty janë djegur vetëm orenditë do të kompensohen me produktet bazuar në vlerën e tyre të tregut. E njëjta gjë do të jetë dhe për kafshët e gjalla që janë djegur”, tha Bejtja.
Aktualisht situata nga zjarret nuk paraqet më rrezikshmëri, pasi gjendja është nën kontroll, çka i jep mundësi grupeve të punës në çdo vend të vlerësojnë saktë dëmet e shkaktuara.
/vizionplus.tv
