Mitropolia e Shenjtë e Apollonisë dhe Fierit u ka bërë thirrje partive politike që të që të mos I përdorin ambientet e një kishe për mitingje apo mbledhje politike.
Në një deklaratë për mediat, Mitropolia e Fierit duke e ndalur tek intervista e bërë nga kandidatja e bashkisë Roskovec në ambientet e kishës së Shën Kollit në Kurjan, shprehet se përdorimi I vendeve të shenjta për interesa politike përbën fyerje për besimtarët.
Metropolia I kërkon të gjitha subjekteve politike që përpara se të veprojnë të marrin leje fillimisht pranë Kishës Orthodokse Autoqefale në Shqipëri.
Reagimi i Mitropolisë të Shenjtë të Apollonisë dhe Fierit:
DEKLARATË
Duke marrë shkas nga një emision i dhënë në ERTV, dhe nga qarkullimi i këtij emisioni në rrjetet sociale, ku një kandidate për Kryetare Bashkie jep një intervistë në ambjentet e një Kishe, pa dijeninë dhe lejen tonë, kërkojmë nga pushteti politik dhe vendor, si edhe nga të gjitha forcat politike, shoqata apo individë, që të mos përdorin Kishat dhe Tempujt e Shenjtë për deklarata, mbledhje apo mitingje politike.
Përdorimi i tyre për motive të tilla përbën së pari një Sakrilegj ndaj vendeve të Shenjta dhe fyerje të ndjenjave të besimtarëve, pasi ato janë vend lutje dhe adhurimi. Së dyti, përbën shkelje të “Marrëveshjes ndërmjet Këshillit të Ministrave të Republikës së Shqipërisë dhe Kishës Orthodhokse Autoqefale të Shqipërisë” (Ligji nr. 10 057 Date 22.01.2009). Pikërisht, neni 21 dhe 23 i këtij ligji ndalon ndërhyrjen dhe përdorimin e objekteve fetare nga autoritetet shtetërore, me përjashtim të urdhërit ekzekutiv, pasi është marrë pëlqimi nga Kisha Orthodhokse Autoqefale e Shqipërisë.
