Interesimi i të rinjve nga rajoni i juglindjes për të ndjekur studimet në Universitetin ‘Fan. S.Noli’ të Korçës vazhdon të jetë I lartë. Universiteti ka përcaktuar për vitin 2019-2020 se do të ketë 1200 kuota pranimesh, ndërkohë që janë regjistruar gati 4300 aplikime.
Rektori I këtij Universiteti, Prof.dr Ali Jashari, në një prononcim të tij thotë se aplikimet janë gati sa trefishi I kuotave që ka miratuar senati akademik.
Ai sqaron se në datën 2 shtator fillon regjistrimi për raundin e parë, nga tre gjithsej që janë në dispozicion nga Universiteti I Korçës.
Pas këtyre tre raundeve I takon senatit akademik të vendosë mbi shpërndarjen e kuotave për ata të rinj që kanë zgjedhur të ndjekin studimet në këtë institucion të arsimit të lartë.
Programet më të preferuara në degët e Universitetit ‘Fan.S.Noli’ vazhdojnë të mbeten ato të infermierisë dhe mamisë, financë-ekonomi dhe administrim e politikë sociale. Këtë vit çelet për herë të parë edhe programi I edukimit fizik dhe sporteve ku pritet të nisin studimet 23 djem dhe 7 vajza të interesuar për të frekuentuar këtë degë të re.
