Iniesta, shpresoj që Enrique të qëndrojë

Andres Iniesta del hapur, “e gjithë skuadra e mbështet Luis Enriquen dhe shpreson që ai të mos largohet”. Kapiteni i Barcelonës ka dalë kështu në mbrojtje të trajnerit asturian, mjaft i kritikuar pas asaj humbjeje me PSG dhe që aktualisht ende s’e ka ripërtërirë kontratën. Zyrtarisht Enrique e mbyll aventurën e tij në krye të Barcelonës në fund të këtij sezoni dhe ende nuk ka asnjë raportim rreth ndonjë bisedimi të mundshëm me klubin për këtë temë. “Jemi të gjithë me trajnerin, nuk e di nëse ai do të vazhdojë apo jo të jetë me ne sezonin e ardhshëm, por shpresoj që po” – tha Iniesta pas fitores 2-1 me Atleticon e Madridit në fundjavë. “Shpresoj që ai të ketë të njëjtën dëshirë për të fituar trofe sikurse e ka pasur gjithmonë” – shtoi më tej kapiteni i Barcelonës. Që pasi mori drejtimin e katalanasve në vitin 2014-të, Enrique ka fituar 7 trofe. 2 kampionate, 2 kupa të Spanjës, një Champions League, një Super-Kupë Evrope dhe një Kupë Bote. Aktualisht lufta për titull është rihapur, pas humbjes 2-1 që Reali i Madridit pësoi me Valencian dhe Iniesta theksoi se e gjithë skuadra nuk ka hequr ende dorë nga titulli i La Ligas. Por nga ana tjetër situata në Champions League nuk duket dhe aq pozitive. Humbja 4-0 në Parc De Prince, kërkon të paktën 5 gola në Camp Nou që Barcelona të kualifikohet përballë PSG. “E dimë që është e vështirë, por duhet të besojmë në shanset që kemi. Them se ne i kemi potencialet për t’ia arritur, edhe pse rezultati 4-0 duket tejet i thellë” – tha Iniesta.