Partia Demokratike reagoi pas indinjatës së mjekëve dhe infermierëve të Urgjencës së Lezhës për shpërblimet e premtuara nga qeveria. Dega e PD në Lezhë akuzoi kryeministrin Edi Rama në “Facebook” se po mashtron publikisht.
“Partia Demokratike dënon aktin e mashtrimit të Rilindjes për pagat e mjekëve dhe infermierëve. Ai që qeverisë nga “burgu” i Surrelit me facebook shqiptarët, mashtroi publikisht, duke iu dhëne si shpërblim personelit shendetësor të Lezhës jo 1000 euro për doktorët dhe 500 euro për infermierët, por tallet duke i “shpërblyer” me nga 5 mijë lekë.”
Duke u dalë në krah mjekëve dhe infermierëve, PD kërkoi nga Rama që të mbajë premtimet e dhëna.
“Protesta e bluzave të bardha të Lezhës ka gjithë mbeshtetjen e PD, si reagim ndaj sakrificës së tyre dhe të së drejtës së shpërblimit përballë rrezikut ndaj pandemisë nga Corona virus. PD i bën thirrje Edi Ramës të mbajë premtimin për shpërblimin e mjekëve si detyrim ndaj punës së shkëlqyer që po bëjnë dhe të ndalë panikun që përhap vetë nga bodrumi i Surrelit!”
Personelit të Urgjencës së Lezhës i është dhënë 5 mijë lekë të rinj shpërblim. Por mjekët dhe infermierët e kanë refuzuar, duke shprehur se ndjehen të pavlerësuar. Ata pretendojnë të marrin 1 mijë euro shpërblim.
