Në festën e Krishtlindjes nuk mungojnë asnjëherë mesazhet e klerikëve drejtuar besimtarëve.
Këto mesazhe nuk janë vetëm me përmbatje fetare, por ato mbartin edhe porosi dhe thirrje shpesh drejtuar politikanëve si përgjegjës për mbarevajtjen ose jo të punëve të kombit, shtetit dhe shoqërisë.
Imzot Xhorxh Frendo, Arqipeshkvi i Metropolitit Tiranë-Durrës, në një lidhje të drejtpërdrejtë për edicionin qëndror të lajmeve në Vizion Plus është shprehur se mesazhi për këtë vit është më shumë solidaritet dhe punë në të mirë të të gjithëve.
Gjithashtu imzot Frendo ka bërë thirrje politikanëve që të ulen në dialog, për të zgjedhur një të mirë të përbashkët, për një Shqipëri të lumtur dhe të pastër.
Cili është mesazhi juaj për këtë vit?
Mesazhi kryesor i Krishlindjes është dinjiteti i çdo njeriu, nga momenti kur Jezusi u bë njeri dhe ka lindur njeriu ka fituar një dinjitet të ri dhe duhet të respektohet personaliteti i çdo personi pavarsisht nga seksi, besimi, raca. Mesazhi i dytë është i solidaritetit, pasi kur Jezusi u bë njeri si ne ka treguar solidaritetin e tij me ne në çdo situatë të vështirë ose jo dhe një mesazh tjetër është ai i dialogut, sepse ai dialog që ka filluar me krijimin e njeriut.
Si është gjetur pranë të prekurve nga tërmeti kisha juaj? Çfarë ka për tju thënë atyre?
Së pari mesazhi i krishtëlindjes e dërgon Jezusin shumë afër atyre sepse ai ka lindur jashtëvendit të tij jashtë shtëpisë. Ne kemi qenë dhe jemi shumë afër personave që po vuajnë nga fatkeqësia e tërmetit. Kisha katolike ka ndihmuar dhe po ndihmon shumë me ushqime, veshmbathje, ilaçe dhe shumë gjëra të tjera. Nuk mund të mbetemi indiferent para situatave të tilla pasi vetë Jezusi na thotë kisha uri e më keni dhënë për të ngrënë, isha zhveshur e më keni veshur në fytyrën e çdo personi që vuan ne shikojmë fytyrën e vetë Jezu Krishtit. Kjo është detyra jonë të jemi afër atyre.
Imzot Frendo, viti 2019 në Shqipëri ishte një vit i një krize politike, cili është mesazhi juaj për klasën politike në vendin tonë?
Shumë kemi folur, kemi theksuar nevojën për dialog, një dialog të vërtetë dhe për këtë arsye kemi theksuar se në këtë dialog të gjithë partitë duhet të kërkojnë së bashku të mirën e përbashkët, të mirën e popullit jo të mirën e partisë. Të mirën e përbashkët për të gjithë dhe të sigurojnë atë paqe që të bëjnë Shqipërinë një vend më të denjë për shqiptarët. Një tragjedi është fakti se Shqipëria po zbrazet, ndaj është i nevojshëm dialogu mes politikanëve që të diskutojnë se cilët janë arsyet pse shumë shqiptarë fatkeqësisht po ikin drejt vendeve të huaja. Politikanët duhet të krijojnë një atmosferë që shqiptarët të ndihen fatlumë për vendin ku jetojnë që ka shumë gjëra pozitive, që unë shpesh të rinjve ju them mos ikni në vend të huaj se asnjë vend nuk është parajsë tokësore. Shqipëria ka shumë gjëra të bukura që duhet ti vlerësojmë, të angazhohemi për një Shqipëri më të drejtë, të pastër dhe të lumtur.
