Ish-ministri i PD-së, dhe njëkohësisht anëtar i grupimit “Për PD-në”, Arben Imami, nuk i ka kursyer kritikat ndaj liderit të selisë blu.
I ftuar në Spotlight nga Alban Dudushi, në Vizion Plus, Imami u shpreh se Partia Demokratike, sipas tij do t’i kishte fituar zgjedhjet edhe pa kryetar.
“Partia Demokratike edhe pa kryetar mund t’i kishte fituar këto zgjedhje. Unë jam i bindur që problemi themelor i PD-së, që e ka çuar në një rrugë krejt kithtas me gjithë historinë e saj, me traditën e saj, me idetë e saj, me sharmin e saj, është ky person.”
Shpërthimi i Imamit ka shkuar më tej, duke e quajtur Bashën një njeri që vetëm gënjen dhe mashtrues ordiner.
“Ku ka militant, ka parti. Ku s’ka militant, nuk ka parti. Por, militantët pa lidership nuk kanë ku shkojnë. Sepse militant të beson 100%, pa rezerva, sakrifikon. Hapja e partisë është rruga e vetme. Hapja, ideologjia, organizimi. Recetat janë të thjeshta, janë të provuara në histori dhe në historinë e partisë demokratike e partive politike evropiane. Në qoftë se ke një agjendë, një lider, organizim, të gjitha vijnë. Por, një njeri që nuk do që ta luajë këtë rol, që nuk do të udhëheqë, por të përjashtojë njerëzit. Një njeri që gënjen. Kemi të bëjmë me një mashtrues ordiner. Një njeri që shkel jo me dy, por me katër këmbë statutin e partisë.”
