Nga Blerina Cene
Për gjashtë veprat penale që akuzohet, Ilir Beqaj sipas SPAK, e ka thyer ligjin në 27 momente të ndryshme gjatë kohës kur drejtonte agjencinë e fondeve të SASPAC.
Prokuroria e Posaçme njoftoi sot marrjen e tij të pandehur për abuzim me fondet e Bashkimit Europian, së bashku me 9 persona të tjerë. Mes të pandehurve bën pjesë edhe Ermal Kurtulaj, me të cilin, Prokuroria dyshon se Beqaj ka kryer mashtrim dhe ka pasur njohje të hershme.
Prokurorja Elida Kaçkini që urdhëroi arrestimin e Ilir Beqajt mëngjesin e 4- korrikut të vitit të shkuar, thotë se në bashkëpunim me njëri tjetrin, ata shkelwn ligjin duke paracaktuar fituesin e tenderave, në mënyrë që të përfitonin vetë.
“Këto tendera janë zhvilluar me procedurë negocimi konkurruese, të cilat janë urdhëruar për t’u kryer nga i pandehuri, Ilir Beqaj në cilësinë e Drejtorit të Përgjithshëm, i cili ka nënshkruar mbi dakordësinë për të kryer shërbimin e caktuar. Një pjesë e shërbimeve rezulton se të jenë prokuruar në mënyrë fiktive, pasi shoqëritë tregtare nuk kanë ofruar shërbime, por kanë mashtruar në bashkëpunim me të pandehurit Ilir Beqaj dhe Ermal Kurtulaj, për qëllime përfitimi material”, thuhej në njoftimin e SPAK.
Më pas Beqaj, sipas SPAK, ka fshehur origjinën e parave duke deklaruar të ardhura të rreme në formularin e vetëdeklarimit.
“I pandehuri Ilir Beqaj ka kryer deklarim të rremë mbi pasurinë e tij nga viti 2020 e në vazhdim, pasi ka fshehur interesat pasurore në 50% të kuotave në një shoqëri tregtare dhe nuk ka deklaruar shpenzimet e kryera për investime në këtë shoqëri; ka fshehur pronësinë dhe nuk ka deklaruar shpenzimet në lidhje me një apartament të ndodhur në qytetin e Vlorës; si dhe ka fshehur pronësinë e një automjeti”, tha SPAK.
Beqaj akuzohet se ka kryer korrupsion pasiv, 2 herë mashtrim, shkelje të barazisë në tendera, falsifikim dokumentesh dhe fshehje pasurie. Megjithatë, ai është vënë nën akuzë edhe si ministër i shëndetësisë, për dosjen e sterilizimit, ku akuzohet për vjedhje duke shpërdoruar detyrën sipas grupit të strukturuar kriminal. Kjo e bën Ilir Beqajn funksionarin e parë publik ndaj të cilit SPAK ka dyshime për grup kriminal.
/vizionplus.tv
