Kandidati i koalicioni Bashkë Fitojmë për Bashkinë e Durrësit Igli Cara pranoi rezultatin e dalë nga zgjedhjet vendore të 14 majit.
Përmes një postimi në Facebook, Cara ka falenderuar të gjithë ata që e votëbesuan, teksa shton se vullneti i qytetarëve u deformua nga disa faktorë.
Teksa pranon rezultatin e dalë nga procesi i numërimit, Cara tha se ai do të vazhdojë jetën e tij në Durrës, duke takuar dhe biseduar me çdo qytetar.
Në përfundim të reagimit, ai thotë se lidhja me Durrësin dhe ndershmëria, mbeten për mua zgjidhje pa kompromis.
Mirënjohës ndaj çdo bashkëqytetari që më mbështeti përgjatë këtij rrugëtimi, duke më votëbesuar në këto zgjedhje!
Falenderues ndaj çdo demokrati, opozitari, mbështetësi, që u bënë pjesë e proçesit të votimit dhe numërimit, duke tejkaluar vështirësitë dhe duke qenë aty, për t’i dhënë vlerë çdo vote!
Një rezultat i ndikuar nga shumë faktorë, i cili tregoi se vullneti i qytetarëve mund të kushtëzohet, të kontrollohet dhe të tjetërsohet, në emër të zhvillimit, për të përqendruar pushtetin në një dorë të vetme, që shpërdoron dhe grabit ditën për diell, pasuritë kombëtare dhe fondet publike.
Durrësi mbetet familja jonë e madhe, që na bën bashkë, ku unë do të vazhdoj, si çdo ditë, të shikoj miqtë, kolegët, qytetarët në sy, duke u shtrënguar duart, sepse lidhja me këtë qytet dhe ndershmëria, për mua mbeten zgjedhje pa kompromis.
Faleminderit me zemër!
