Unioni Nderkombëtar Demokrat (IDU) ka miratuar me votë unanime Rezolutën për Shqipërinë të paraqitur nga Partia Demokratike e Shqipërisë, përmes të cilës kërkohet të ndalet persekutimi politik kundër udhëheqësve të opozitës, duke siguruar një mjedis të drejtë dhe të hapur për të gjithë aktorët politikë që të bëjnë fushatë pa asnjë persekutim politik.
Në rezolutë theksohet se garantimi i zgjedhjeve të lira dhe të ndershme, duke garantuar pavarësinë e administratës publike nga partia në pushtet, si dhe krijimi i një qeverie kujdestare, e modeluar sipas Maqedonisë së Veriut, për të siguruar zgjedhje të lira dhe të ndershme.
Kjo është rezoluta e tretë që miratohet nga grupime politike që i përkasin qendrës së djathtë dhe të djathtëve nga vende të ndryshme të Botës në ditët e fundit. Gjithashtu PPE ka miratuar një rezolutë për Shqipërinë.
Në prezantimin e Rezolutës znj. Vokshi, përfaqësuese e PD, theksoi: Përtej propagandës së madhe, të paguar me para korrupsioni dhe krimi të organizuar, ekziston një realitet shumë i errët dhe i trishtë. Shqipëria ndodhet nën një regjim autoritar, ku Kryeministri kontrollon të gjitha pushtetet (politike, institucionale, ekonomike, mediatike dhe drejtësisë).
Rezolutë për Shqipërinë
Në rezolutë shprehet shqetësim i madh në lidhje me: përqendrimin e pushtetit në duart e një personi dhe shndërrimin e zgjedhjeve në fasadë; persekutimin politik ndaj të gjithë liderëve të opozitës, që përballen me persekutim politik, burgosje dhe kërcënime si Prof. Dr. Sali Berisha, Ilir Meta, Fatmir Mediu, Ervin Salianji dhe Fredi Beleri, duke e krahasuar me regjimet autoritare në Bjellorusi dhe Tunizi; korrupsionin e shfrenuar dhe lidhjet mes krimit të organizuar dhe drejtuesve të Partisë Socialiste, për të manipuluar zgjedhjet dhe ndikimin ne emërimet në postet kyçe; dështimin e qeverisjes së Ramës për të trajtuar rekomandimet e OSBE/ODIHR në lidhje me abuzimet elektorale.
Shqetësimi I IDU bëhet akoma më i madh duke pasur parasysh afrimin e zgjedhjeve të vitit 2025 ndërkohë që represioni politik po përshkallëzohet, që dëshmon që gjyqësori është kthyer në një mjet për të shtypur opozitën dhe për të manipuluar zgjedhjet.
Rezoluta e IDU kërkon:
- Të ndalet persekutimi politik ndaj liderëve të opozitës, dhe sigurimi i një mjedisi të lirë e të ndershëm për të gjithë aktorët politikë në mënyrë që të bëjnë fushatë pa asnjë persekutim politik.
- Garantimin e shtetit të së drejtës dhe integritetit institucional si themele të një shoqërie demokratike.
- Sistem gjyqësor të paanshëm dhe të lirë nga ndërhyrjet politike.
- Intensifikimin e luftës kundër krimit të organizuar, trafikimit të drogës dhe pastrimit të parave, duke siguruar që veprimet të mbeten të paanshme duke mos targetuar opozitën.
- Zgjedhje të lira dhe të ndershme që garantojnë pavarësinë e administratës publike nga partia në pushtet.
- Krijimin e një qeverie kujdestare, sipas modelit të Maqedonisë së Veriut, për të siguruar zgjedhje të lira dhe të ndershme.
