Mes dëshpërimit për vrasjen e të birit, babi i Klajdi Bitrit kërkon ndihmën e autoriteteve për të sjellë në atdhe trupin e 23-vjeçarit. Klajdi Bitri u vra pasditën e të dielës në Itali nga një shtetas algjerian që e qëlloi me një shtizë peshkimi, teksa ndërhyri për të shuar konfliktin mes autorit dhe mikut të tij italian.
Agim Bitri kërkon që trupi i të birit të prehet sa më shpejt në Shqipëri dhe thekson se e ëma e viktimës nuk është ende në dijeni të ngjarjes. Sipas tij, lajmin e kobshëm për humbjen e djalit nuk mund t’ia japë pa pasur trupin e tij.
“Më ka ndodhur një fatkeqësi shumë e madhe. Djali im shkoj për ndarjen e sherrin dhe ma qëlluan, ma vranë, pa asnjë faje. Autoritet thanë që ishte pa faj. Kishte 6 vite që punonte në Itali. Kërkoj drejtësi për fëmijën time se për çfarë i ndodhi kjo. Ishte në lule të rinisë dhe nuk shikoj asgjë.
Kërkoj ndihmë që trupi të vijë sa më shpejt në Shqipëri. Gruaja akoma nuk e di. Kam dal jashtë për të folur që mos të kuptoje, i kam thënë që është në gjendje të rëndë. Nuk dimë çfarë të bëjmë. Shteti shqiptar të më ndihmojë që fëmija imë të vijë sa më shpejt. Drejtësia të vejë në vend”, deklaroi Agim Bitri.
Ndërkohë, Xhuliano Bitri, vëllai i viktimës ka kërkuar drejtësi për vrasjen e Klajdit. I ndjeri ishte emigrant në Itali prej disa vitesh dhe gjeti vdekjen në tentativë për të shuar konfliktin mes mikut të tij dhe autorit të krimit.
