Deputeti i Partisë Demokratike, Flamur Hoxha, njëherazi dhe Sekretar për Klimën e Biznesit në PD, thotë se plani i qeverisë për rimëkëmbjen është një mburojë e dështimit 8-vjeçar të qeverisjes për të ofruar mirëqenie.
Duke folur në emisonin “E-ZONE”, në “Vizion Plus”, Hoxha thotë se qeveria nuk ofron zgjidhje për problemet që shoqërojnë ekonominë.
“Është një program që fokusohet te pandemia dhe tërmeti, për të anashkaluar problematika më të mëdha që ka Shqipëria. Vendi sot ndodhet në një skamje, ku ka nevojë për nevoja bazike, për rrugë, arsim, infrastrukturë, drita. Programi duket si sezonal, jo 4-vjeçar. Më shumë duken si disa fletushka, jam i bindur që kjo qeveri nuk do ta ketë të gjatë.”
Sipas Hoxhës, taksa progresive nuk ofron barazi dhe se duhet që kompanitë që punojnë në tregje monopol, të taksohen dy herë më shumë nga sa paguajnë aktualisht.
