Në hollin e Pallatit të Kongreseve në Tiranë po zhvillohen homazhet në nder të gjyqtarit Astrit Kalaja, i cili u vra dy ditë më parë në sallën e Gjykatës së Apelit, teksa ishte në krye të detyrës. Ceremonia nisi në orën 09:00 dhe do të zgjasë deri në orën 11:00.
Të pranishëm në homazhe janë familjarë, kolegë, figura të sistemit të drejtësisë dhe autoritete të larta shtetërore. Kryeministri Edi Rama mori pjesë në homazhe, por nuk dha asnjë prononcim për mediat pas përfundimit të ceremonisë.
Pas homazheve shtetërore në Tiranë, trupi i gjyqtarit do të dërgohet për në qytetin e tij të lindjes, Shkodër, ku do të prehet në orët e pasdites.
Ngjarja e rëndë ndodhi më 6 tetor në ambientet e Gjykatës së Apelit, ku 30-vjeçari Elvis Shkambi hapi zjarr ndaj gjyqtarit Kalaja, menjëherë pas shpalljes së vendimit për një çështje pronësie. Autori është nipi i Gjon Shkambit, një nga palët në procesin gjyqësor. Nga të shtënat mbetën të plagosur edhe dy persona të tjerë, Ragip dhe Ervis Kurtaj, babë e bir, gjithashtu palë në të njëjtën çështje.
Vrasja e gjyqtarit në sallën e gjyqit ka tronditur opinionin publik dhe ka rikthyer në qendër të vëmendjes çështjet e sigurisë në ambientet gjyqësore dhe dobësitë në sistemin e drejtësisë.
/vizionplus.tv
