Norvegjia ka nisur hetimet ndaj ish-kryeministrit të vendit Thornbjorn Jagland për lidhjet e tij me pedofilin dhe trafikantin seksual Jeffrey Epstein.
Emri i Jagland doli disa herë në 3 milionë dokumentet e publikuara nga Departamenti Amerikan i Drejtësisë, në komunikime me ish-financierin.
Në një prej email-eve Jagland i përmendte Epstein Tiranën, ku kishte qenë për një vizitë zyrtare në vitin 2012 dhe u takua me figura të rëndësishme në qeverinë e atëhershme .
“Isha në Tiranë, vajza të jashtëzakonshme”, shkruante Jagland në email.
Në një tjetër komunikim ai fliste për një vizitë të mundshme në ishullin famëkeq të pedofilit në Karaibe, që nuk dihet nëse ka ndodhur.
Një njësi speciale e policisë norvegjeze, e cila po analizon dosjet e sapo publikuara të Epstein në SHBA, tha se 75-vjeçari Jagland dyshohej për “korrupsion të rënduar”.
Policia konfirmoi se i kishte kërkuar tashmë ministrisë së Jashtme t’i hiqte imunitetin, të cilin ai e gëzon për shkak të rolit të tij të mëparshëm si diplomat i lartë.
Jagland shërbeu si kryeministër nga viti 1996 deri në vitin 1997. Ai ishte sekretar i përgjithshëm i Këshillit të Evropës nga viti 2009 deri në vitin 2019 dhe kryesoi Komitetin Norvegjez të Nobelit nga viti 2009 deri në vitin 2015./vizionplus.tv
