Rreth 56 studentë të Akademisë së Sigurisë dyshohet se janë helmuar nga ushqimi i konsumuar në ambientet e institucionit, ndërsa lidhur me ngjarjen policia ka arrestuar dy persona dhe ka shpallur një tjetër në kërkim.
Në pranga kanë rënë teknologia Kristjana Plaka, 23 vjeç dhe Kujtim Ballgjini, 52 vjeç, kuzhinieri i kompanisë private të kateringut, e cila kishte kontratë me Akademinë e Sigurisë për furnizimin me tre vaktet ushqimore të studentëve. Ndërkohë, administratoria e kompanisë është shpallur në kërkim.
Ngjarja ndodhi pasi studentët konsumuan drekën në ambientet e Akademisë së Sigurisë dhe më pas nisën të shfaqnin simptoma të rënda, si të vjella dhe dhimbje të forta barku.
Për shkak të komplikacioneve, ata u transportuan drejt spitalit, ku morën ndihmën mjekësore.
Pas marrjes së mjekimit, studentët janë larguar nga spitali.
Ndërkohë, institucionet përkatëse kanë nisur hetimet për zbardhjen e plotë të rastit dhe përcaktimin e shkakut të helmimit.
Burime bëjnë me dije se specialistë të Institutit të Shëndetit Publik (ISHP) kanë marrë mostra ushqimore dhe materiale të tjera për analiza laboratorike, me qëllim identifikimin e faktorëve që çuan në incidentin e rëndë.
