Tonet e ashpra të presidentit Ilir Meta, kandidati për deputet i LSI në Tiranë, Edmond Haxhinasto i sheh si normale në situatën ku gjendemi.
Në një intervistë për emisionin “7 pa 5” në “Vizion Plus”, Haxhinasto deklaroi se kreu i shtetit po përpiqet të mbrojë zgjedhjet e lira dhe të ndershme.
“Presidenti po ushërben zgjedhjeve të lira dhe të ndershme. Është bërë si një sirenë e fortë alarmi për çdo parregullsi në procesin zgjedhor sepse është i bindur, siç jam i bindur edhe unë, që Shqipëria duhet t’i thotë “Ndal”, t’i hapë fund periudhës së prekjes së zgjedhjeve. Në një moment tjetër, kur institucionet funksionojnë dhe ligji zbatohet, patjetër që roli i presidentit është krejtësisht tjetër. Por sot jemi në një situatë tjetër, ku duhet të merremi me thelbin e mesazhit që jep presidenti: Të mos preket vullneti i qytetarëve. Ata janë sovrani në Shqipëri”, tha Edmond Haxhinasto përballë gazetarit Thimi Samarxhiu.
