Deputetja e opozitës parlamentare, Rudina Hajdari u shpreh se personat që pengojnë integrimin e vendit përmes krimit politik dhe korrupsionit duhet të ndëshkohen.
Hajdari tha nga foltorja e Kuvendit se politika po i tejkalon përmasat e një krimi kombëtar, ndërsa theksoi se Parlamenti duhet të ushtrojë një rol më mbikëqyrës.
“Roli i Këshillit të Integrimit Europian, bëhet më i rëndësishëm nëse brenda samitit të Zagrebit hapen negociatat, ndaj edhe parlamenti duhet te ushtrojë një rol më mbikëqyrës. E vërteta është ndryshe. Cfarë ndodh sot? Pazarxhijntë e politikës sonë orkestrojnë krizën e radhës. Duke na turpëruar para partnerëve ndërkombëtarë. Luajnë ping pong me fatin tonë, që të mbrojnë interesat e tyre personale, që të mbrojnë veten e tyre. Nëse duam të kuptojmë cfarë duam nga integrimi, duhet t’i drejtohemi të rinjve. Ata duan punësim shpresë mirëqënie, por kjo nuk po ndodh. Nuk mund të ndodhë nëse nuk bashkohemi për të ndëshkuar krimin politik, korrupsionin, të ndëshkojmë këta njerëz që mbajnë peng integrimin. Duhet të kërkojmë largimin e tyre dhe t’i hapim rrugë vetes. Ajo që po bën sot politika i tejkalon përmasat e një krimi kombëtar.”
Ndër të tjera, Hajdari deklaroi se është munduar të angazhohet me të gjitha palët për të ndërtuar një shoqëri me baza të shëndosha, teksa shtoi se duhet të jetë më e lartë përgjegjësia që duhet të kenë ndaj shqiptarëve.
“Është një proces madhor për rininë, për vendin. Pritshmëritë e shqiptarëve sot janë shumë të larta, ne duhet të jemi më të përgjegjshëm ndaj tyre. Kupa po mbushet, shqiptarëve i ka ardhur në majë të hundës kjo sjellje, ndaj përgjegjësitë tona duhet të jenë më të larta. Duhet t’i kthehjmë shpresën të rinjve. Është detyra jonë të largojmë pazarxhinjtë e politikës. Sepse në të kundërt këta do na sulmojnë, por ne nuk dorëzohemi, do luftojmë për një Shqipërinë më pranë Evropës.”
