Segmenti rrugor rreth 4 kilometra që të çon drejt pikës turistike dhe historike të Gurëzezës, në Cakran të Fierit, është tërësisht i amortizuar dhe prej 17 vitesh nuk ka njohur asnjë investim.
Gjendja e rrugës është kthyer në një shqetësim të madh për banorët e zonës, por edhe për vizitorët që duan të shkojnë drejt një prej pikave me vlera historike dhe turistike të kësaj zone.
Sipas banorëve, përveç vendbanimit të lashtë ilir të Gurëzezës, kjo rrugë të çon edhe drejt Teqesë 400-vjeçare të Baba Refatit.
Shehu i teqesë, Pëllumb Sulaj, thotë se amortizimi i rrugës ka sjellë një rënie të ndjeshme të numrit të vizitorëve dhe besimtarëve, duke ndikuar edhe në zbehjen e festimeve tradicionale, krahas shpopullimit të zonës.
“Kjo rrugë është bërë që në 2009, është një problem i madh për turizmin dhe për besimtarët. Këtë vit 2 turistë kam parë. Vitet e tjera kanë ardhur me motora, me vështirësi. Besimtarët janë reduktuar për shkak të rrugës. Kemi pasur një takim me zotin kryetar dhe na kanë premtuar se do ta rregullojnë, por e njëjta gjë është”, thotë Pëllumb Sulaj, shehu i teqesë.
Për banorët e Cakranit, amortizimi i këtij segmenti rrugor është kthyer në një problem të përditshëm. Ata thonë se rruga u shërben për të shkuar në tokat e tyre bujqësore, por edhe në varrezat e fshatit, ku, mes vështirësive të shumta, përcjellin të afërmit e tyre për në banesën e fundit.
Banorët pohojnë se këtë vit edhe turistët e kanë braktisur thuajse tërësisht zonën, pasi shumë prej tyre heqin dorë nga vizita për shkak të gjendjes së rënduar të rrugës.
“Ne e kemi shumë të nevojshme rrugën. Rruga duhet, është shumë e nevojshme për Gurëzezën. Ka më shumë se 17 vite në këtë gjendje. Këtu ka pasur dhe turistë, por nuk ngjiten dot në këmbë ose me motor. Prandaj i lutem të na i bëjnë rrugën. Ka pasur raste që turistët janë kthyer nga rruga sepse nuk shkonin dot. Gjatë dimrit është shumë e vështirë, vetëm me gomar”, thotë një banor.
“Rruga aty ka qenë rrugë këmbësore me kafshë. Në 2026 akoma kalojmë me kafshë. Bashkisë ne i japim taksa të papara edhe atje akoma arrin të shkosh me kafshë. Në Gurëzezë. Këtu vijnë turistë që duan të shkojnë në Gurëzezë dhe nuk ngjiten dot”, thotë një banor tjetër.
Përballë kësaj situate, banorët thonë se ndër vite janë ankuar si në njësinë administrative, ashtu edhe në Bashkinë Fier, por situata vijon të mbetet e pandryshuar.
Ata bëjnë apel për sistemimin dhe rikonstruksionin e këtij segmenti rrugor, i cili, sipas tyre, po penalizon ndjeshëm jo vetëm jetën e përditshme të banorëve, por edhe zhvillimin e turizmit në zonë.
