Protestat e fermerëve grekë janë përshkallëzuar në javën e tretë, pasi pjesëmarrësit refuzuan ftesën e kryeministrit Kyriakos Mitsotakis për t’u takuar dhe për të negociuar.
Situata mbetet kritike, me fermerët që kërkojnë angazhime specifike qeveritare përpara se të hyjnë në dialog.
Të dielën, përfaqësuesit e fermerëve ia komunikuan kërkesat e tyre zyrës së kryeministrit. Në krye të listës së tyre është rrëzimi i të gjitha akuzave kundër fermerëve për pjesëmarrje në protesta dhe pagesa të menjëhershme të subvencioneve dhe kompensimit të papaguar.
Fermerët kërkojnë gjithashtu zbatimin e projekteve të infrastrukturës, karburantin pa taksa dhe një paketë masash për të adresuar rrethanat e vështira të këtij viti.
Përgjigja fillestare e qeverisë e përshkroi listën si “maksimaliste”, duke vënë në dukje se disa kërkesa bien ndesh me ligjin.
Kryeministri shprehu habi për refuzimin e ftesës, teksa përsëriti se qeveria mbetet e hapur për dialog dhe shtoi se masat mbështetëse po studiohen brenda kornizës së opsioneve të realizueshme.
Ndërkohë bllokimi i pikave kyçe nga ana e fermerëve vazhdon. Gjatë ditëve në vijim protestave me traktorë do t’iu bashkohen edhe kamionistët me mjetet e tyre.
/vizionplus.tv
