Në Gjykatën Themelore të Prishtinës, u zhvillua seanca e parë ndaj ministres së Drejtësisë Albulena Haxhiu, deputetit nga Aleanca për Ardhmërinë e Kosovës, Pal Lekaj si dhe ish-deputetëve, Besa Baftiu e Donika Kadaj-Bujupi.
Ata akuzohen për hedhjen e gazit lotsjellës në Kuvendin e Kosovës në shkurt të vitit 2016-të.
Ministrja e Drejtësisë, Albulena Haxhiu, tha nuk e kundërshton akuzën. Por ajo shtoi se veprimi i saj ishte politik dhe jo kriminal.
ALBULENA HAXHIU
MINISTRJA E DREJTËSISË
“E kuptoj aktakuzën, nuk e kundërshtoj si të tillë për faktin se në vitet 2015-16 Kosova është përballuar me dy projekte të rrezikshme ka qenë obligim i yni si deputet i Kuvendit të Kosovës që të ndërmarrim veprime protestuese në mënyrë që zëri dhe argumentet tona politike që nuk dëgjoheshin të merren parasysh. Qëllimi jonë nuk ka qenë qëllim kriminal është shumë e rëndësishme edhe për prokurorin dhe për ju gjyqtare sepse në një proces gjyqësor është shumë i rëndësishëm i. Por, thjesht qëllimi jonë ka qenë ta mbrojmë Kosovën nga cenimi i territorit por edhe nga bosnjëzimi i saj.”
Edhe deputeti i Aleancës për Ardhmërinë e Kosovës, Pal Lekaj, u vetedeklarua i pafajshëm, pasi sipas tij ky veprim ishte i domosdoshëm për të mbrojtur territorin e Kosovës.
PAL LEKAJ
DEPUTET I ALEANCËS PËR ARDHMËRINË E KOSOVËS
“Sa i përket veprimi tonë ka qenë veprim politik i domosdoshëm dhe betimi i deputetit është për të mbrojtur shtetin e Kosovës, territorin për të mos lejuar askënd ta cenoj territorin. Prandaj, veprimet e mija kanë qenë politike dhe nuk ndihem fajtor për veprimet.”
Për hedhjen e gazit lotsjellës në Kuvend në vitin 2018 u dënua me 1 vit e 6 muaj shërbim prove edhe kryeministri aktual i Kosovës, Albin Kurti.
