Gjykata e Posaçme Antikorrupsion ka rrëzuar kërkesën e kryebashkiakut të Tiranës, Erion Veliajt për kthimin e telefonit të sekuestruar në momentin e arrestimit në zyrën e tij.
Veliaj mbahet në qeli nën dyshimet se kreu korrupsion në nëntë raste dhe pastroi para. Prokurorët, Olsi Dado dhe Altin Dumani thonë se kanë qenë kompanitë e zotëruara de facto dhe de jure nga bashkëshortja e tij Ajola Xoxa ato që kanë pastruar paratë.
Bashkëshortja e kryebashkiakut të Tiranës ndodhet nën masën detyrim paraqitje. Ndërsa Erion Veliaj gjendet në qelinë e paraburgimit të Durrësit që prej arrestimit të tij më 10 shkurt.
Ndërkohë kryetari i bashkisë së Tiranës ironizoi sërish prokurorin Ols Dado dhe gjyqtarin Erion Bani përmes një reagimi nga paraburgimi i Durrësit.
Veliaj shkruan se arrestimi i tij u bë për shkak të frikës së këtyre të fundit, se mos prish provat, të cilat tanimë sipas kryebashkiakut janë në dorë të SPAK-ut.
Erion Veliaj: Por, gjer sa të shihemi sërish, më duhet të vazhdoj çmontimin e kurthit pse jam në burg: rrezik ikje, prishje provash, rrezik shoqëror. Dje rrëzova “frikën e ikjes” prej Ols Dados e Erion Banit, pasi kisha ikur 3 herë e isha kthyer 3 herë, teksa gatuhej çarku ndaj meje. Arsyeja e dytë pse gjykatësi Bani pranoi nga Olsi burg për mua, është rreziku i prishjes së provave. Po cilat prova do prish unë? Celularët i ka Olsi, timin dhe të nja 10 grarive në Tiranë, me të cilët mund të vojerizojë gjithë ditën e gjithë natën, të shohë çdo foto familjare, bebet, kërthizën, dhëmbin e parë, videot e fjalëve të para, fotot me gjyshin e ndjerë në plazh; të gjitha provat e nevojshme për ku e si jetojmë.
Kryetari i Bashkisë së Tiranës është vënë nën hetim për korrupsion pasiv dhe pastrim parash. Prokuroria e Posaçme e dyshon se i ka kryer këto vepra në bashkëpunim me gruan e tij, Ajola Xoxa.
/vizionplus.tv
