Kancelari gjerman Olaf Scholz ka shkarkuar ministrin e Financave, Christian Lindner, hap ky që mund ta minojë koalicionin qeverisës trepartiak.
Vendimin ai e ka bërë të ditur në një konferencë për mediat pas disa javëve të mbushura me mospajtime dhe konflikte mes partnerëve të koalicionit rreth buxhetit dhe financimeve.
Scholz njoftoi po ashtu se do të kërkoj votbesim në janar.
“Ndihem i detyruar ta ndërmarr këtë hap për ta parandaluar dëmtimin e vendit tonë. Ne kemi nevojë për një qeveri efektive, e cila e ka fuqinë për të marrë vendime të nevojshme për vendin tonë”, tha kancelari gjerman.
Ministri i shkarkuar iFfinancave kishte kundërshtuar rritjet tatimore apo ndryshimet në kufizimet e rrepta të Gjermanisë ndaj thellimit të borxhit.
Partia Socialdemokrate e Scholzit dhe Të Gjelbrit, të cilat janë pjesë e koalicionit, duan të shohin investime të mëdha shtetërore dhe e hodhën poshtë kërkesën e Demokratëve të Lirë për shkurtimin e programeve të mirëqenies.
Nuk është e qartë nëse Demokratët e Lirë do të largohen nga koalicioni pas këtij vendimi.
“Ai e ka thyer besimin tim shumë shpesh. Ai madje në mënyrë të njëanshme e anuloi marrëveshjen për buxhetin. Ne ishim pajtuar për këtë marrëveshje pas negociatave të shumta. Nuk ka më themel për besim për ta vazhduar bashkëpunimin”, tha Scholz.
Nga ana tjeter Lindner u përgjigj se kancelari Scholz ka kërkuar në mënyrë ultimative prej tij që të shkelen rregullat rreth financimeve.
