Pas një kthese 360 gradë për dërgimin e armëve të rënda në Ukrainë, Gjermania duket se është gati t’i japë dritën jeshile edhe embargos së plotë ndaj importeve ruse të naftës.
Sipas ministrit të Ekonomisë, Robert Habeck, vendi ka arritur të reduktojë varësinë nga nafta ruse me një diferencë të madhe në vetëm nëntë javë. Përpara se të fillonte pushtimi rus i Ukrainës në fund të shkurtit, Gjermania mbështetej tek Rusia për 35% të nevojave të saj për energji, ndërsa aktualisht vlerësohet në 12%.
Italia, Austria, Hungaria, Sllovakia, Spanja dhe Greqia ende nuk e kanë mbështetur publikisht një embargo. Por pozicioni i tyre mbetet për t’u parë këtë të mërkurë gjatë një samiti të ambasadorëve në Bruksel.
Furnizimet me gaz dhe naftë po vazhdojnë në Evropë edhe pse qeveritë kanë dënuar luftën në Ukrainë. BE-ja paguan 450 milionë dollarë çdo ditë në Rusi për naftë dhe 400 milionë dollarë në ditë për gaz natyror.
Para luftës në Ukrainë, Evropa ka importuar nga Rusia 3.8 milionë fuçi naftë në ditë. Në teori, konsumatorët evropianë do të mund t’i zëvendësonin këto fuçi me furnizuesit nga Lindja e Mesme, eksportet e së cilës tani shkojnë kryesisht në Azi, por edhe në Shtetet e Bashkuara, Amerikën Latine dhe Afrikë. Ndërkaq, nafta më e lirë ruse mund të zëvendësojë dërgesat e Lindjes së Mesme në Azi.
Por, për një gjë të tillë tregjeve botërore do t’iu duhej kohë që të përshtateshin. Në Evropë, konsumatorët mund të përpiqen që të ndryshojnë lëvizjen e naftës nga Lindja në Perëndim duke përdorur hekurudhat, kamionët dhe maunet. Rafineritë që prodhojnë benzinë dhe produkte të tjera janë të ndërtuara veçanërisht për të punuar me naftën ruse. Disa nga rafineritë kryesore varen nga një tubacion që vjen nga Rusia.
