Guvernatori i Bankës së Shqipërisë, Gent Sejko vlerësoi se ekonomia shqiptare është goditur rëndë nga pandemia e koronavirusit.
Duke folur për mediat pas mbledhjes së Këshillit Mbikqyrës, Sejko tha se në momentin që u hoq karantina, ekonomia u duk se nisi të merrte frymë.
“Informacioni i marrë në analizë sugjeron se aktiviteti ekonomik ka shfaqur një ngadalësim të fortë në gjysmën e parë të vitit, si pasojë e masave të marra për kontrollin e përhapjes së pandemisë. Relaksimi i masave të distancimit social gjatë fundit të tremujorit të dytë, si dhe stabiliteti monetar dhe financiar i vendit, kanë krijuar premisa për një rikuperim gradual të aktivitetit ekonomik në periudhën në vijim. Pandemia ka sjellë një goditje të rëndë për ekonominë shqiptare, si në nivel makro ashtu dhe në nivel biznesesh e familjes individuale.”
Guvernatori analizoi se ekonomia e vendit tonë është kontraktuar me 2.5% në tremujorin e parë të këtij viti. Për rrjedhojë, janë tkurrur incestimet, janë reduktuar eksportet e mallrave si edhe është ngadalësuar konsumi privat.
“Të dhënat indirekte të disponuara sugjerojnë se aktiviteti ekonomik do të pësojë një rënie dukshëm më të fortë në tremujorin e dytë. Në terma mikroekonomikë, rënia e kërkesës dhe e shitjeve, ka sjellë vështirësi financiare për shumë biznese e familje shqiptare, si pasojë e tkurrjes së të ardhurave dhe e humbjes së vendeve të punës. Këto vështirësi, si dhe pasiguria e perceptuar nga operatorët ekonomikë, tentojnë të zgjasin në kohë efektet e goditjes, nëpërmjet ngadalësimit të konsumit dhe investimeve private.”
Gent Sejko tha se efekti i pandemisë në ekonomi pritet të reduktohet hap pas hapi gjatë tremujorit të ardhshëm.
