Furnizimi me energji elektrike, Balluku: Transmetimi normal, të gjitha linjat në funksion

Kryeministri Edi Rama ka mbledhur në godinën qeveritare Komitetin Ndërministror të Emergjencave Civile për të vlerësuar situatën e krijuar nga përmbytjet dhe për të koordinuar veprimet në terren.

Zëvendëskryeministrja dhe ministrja e Infrastrukturës dhe Energjisë, Belinda Balluku, bëri të ditur se situata paraqitet e përmirësuar në rang kombëtar. Sipas saj, mbi 1 600 punonjës të mbrojtjes civile janë angazhuar në terren që prej datës 2 janar, kryesisht në zonat më të prekura nga reshjet intensive.

Balluku theksoi se situata është menaxhuar edhe në veri të vendit, ku janë regjistruar disa shkëputje të energjisë elektrike në Kukës dhe Librazhd, por ato janë riparuar dhe rikthyer në funksion brenda një kohe rekord. Aktualisht, të gjitha linjat e transmetimit janë funksionale.

“Situata me e mirë në rang vendi. Në terren më shumë se 1600 punonjës, të civilët nga 2 janari janë angazhuar në zonat më të prekura. Është menaxhuar edhe veriu. Kemi pasur disa shkëputje në Kukës dhe Librazhd, por janë kthyer në funksion në kohë rekord. Të gjitha linjat janë funksionale sa i përket transmetimit.

Kaskada ka pasur prurje rekord, 3000 metër kub/sekondë. Kuota e Fierzës ka arritur në 289.77 metra. Prurjet kanë rënë, janë 1500 metër kub/s.

Kemi prurje të kontrolluara. Janë në punë të gjitha agregatet. FA, Aviacioni Civil kanë njoftuar se do ketë reshje edhe sot. Dhe gjatë mesnatës sot presim agravim të reshjeve por kuoatat na lejojnë që të menaxhojmë të gjithë situatën. Angazhim edhe nga bashkitë për të ndihmuar. Fakti që kemi pasur shumë zjarre dhe ka mungesë bimësie që gjithë zonën e jugut ka qenë më e vështirë, por gjithsesi puna ka vazhduar. Theksojmë se në zonat ku ka prezencë ngrice dhe bore drejtuesit e automjeteve duhet të përdorin zinxhirë dhe goma dimërore. Aeroporti i Rinasit është funksional, kemi pasur vetëm disa devijime për shkak të stuhisë, ndërsa me reshje e shiut situata është e menaxhuar. Porti i Durrësit funksional, sot në Ultësirën perëndimore presim rritje të shpejtësisë së erës çka do ta bëjë të vështire lundrimin”, tha ajo.