Presidenti Emmanuel Macron ka hedhur poshtë mundësinë e mbylljes së personave të pavaksinuar në Francë, duke argumentuar se masa nuk është e arsyeshme në kushtet kur funksionon pasaporta shëndetësore.
EMMANUEL MACRON
PRESIDENT I FRANCES
“Nuk është e nevojshme që Franca të ndjekë shembullin e Austrisë dhe shumë vendeve të tjera evropiane, duke izoluar qytetarët e pavaksinuar. Funksionimi i pasaportës së gjelbër e ka treguar dukshëm ndikimin pozitiv në menaxhimin e pandemisë.”
Macron gjithashtu konfirmoi se edhe doza e tretë mund të shtohet si një kusht në pasaportë nëse autoritetet rregullatore e rekomandojnë atë.
“Ne jemi ende në pritje të udhëzimeve nga autoritetet shëndetësore për dozën e tretë, nëse ajo është efektive dhe e nevojshme për publikun e gjerë, atëherë padyshim që do ta përfshijmë në lejen shëndetësore.”
Sakaq, në Gjermani Komisioni i Përhershëm për Vaksinim rekomandoi imunizimin përforcues me dozën e tretë për të gjitha grupmoshat duke nisur nga 18 vjeç, edhe nëse nuk kanë kaluar 6 muaj nga doza e dytë.
Në kulmin e rritjes së numrit të infeksioneve, federata dhe landet paralajmëruan ashpërsimin e masave duke marrë si kriter numrin e shtrimeve në spital.
Ndërkohë, nga kjo e hënë edhe Greqia do t’i ndalojë personat e pavaksinuar që të frekuentojnë hapësirat publike. Kryeministri Kyriakos Micotakis deklaroi se shpërthimi i ri i pandemisë është nxitur kryesisht nga ata që nuk janë imunizuar.
KYRIAKOS MICOTAKIS
KRYEMINISTER, GREQI
“Kjo është me të vërtetë një pandemi e të pavaksinuarve. Greqia është në zi për humbjet e panevojshme sepse thjesht nuk ka normat e vaksinimit të vendeve të tjera evropiane”.
Shteti fqinj nuk do të pranojë testin negativ në restorante, kafene, teatro, bare, palestra, muze apo aktivitete të tjera. Rreth 62% e popullsisë së rritur në Greqi janë vaksinuar plotësisht.
