Gazetari i Vizion Plus, Esido Barkaj ka siguruar fotot e personave të arrestuar pas finalizimit të një operacioni të përbashkët Kosovë-Shqipëri kundër trafikut të armëve.
Në Shqipëri u arrestuan 6 persona, Euxhenio Manushi, 20-vjeç, Endri Papa, 34-vjeç, Aurel Manreka, 28 vjeç, Gersi Llozha, 22 vjeç, Kleu Mucalliu, 26-vjeç; dhe Tonin Shkami, 53-vjeç.
Lexo edhe :
Related Posts
Ndërsa në Kosovë u lëshuan 8 urdhër-arreste.
Siç raportoi Vizion Plus më herët një prej të arrestuarve është Valter Osmani, banues në Kombinat, Tiranë.
Osmani shkonte shpesh në Kosovë për të marrë dhe gjetur armë, të cilat më pas i sillte në Tiranë me bashkëpunëtorë të tjerë me makina dhe autobus.
Ai pritet që në vijim të ekstradohet në Shqipëri pasi të gjitha provat kundër tij janë gjetur këtu.
Sektori kundër trafiqeve në Policinë e Tiranës finalizoi një tjetër operacion ndërkombëtar kundër trafikimit të armëve të zjarrit.
Aksioni u zhvillua në bashkëpunim me autoritetet e Kosovës si dhe i mbështetur nga Europol dhe Eurojust.
Në total u lëshuan 14 urdhëra arresti, konkretisht 8 shtetas nga Kosova dhe 6 nga Shqipëria, ndërkohë një tjetër është shpallur në kërkim.
Në grupin e personave të përfshirë në këtë skemë kriminale në vendin tonë, është edhe Euxhenio Manushi, i cili është arrestuar pak ditë me parë nga Antidroga e Tiranës së bashku me Klajdi Serjanin me 1 kg kokainë të pastër.
Drejtori i Policisë së Tiranës Elton Alushi në një konferencë të përbashkët me palën kosovare nga pika kufitare e Morinës tha ditën e djeshme se në total gjatë operacioneve janë kapur 64 armë zjarri të llojeve të ndryshme.
“Në total, gjatë hetimeve janë sekuestruar 64 armë zjarri dhe municione luftarake, ku 23 armë janë sekuestruar nga shërbimet e Drejtorisë Vendore të Policisë Tiranë dhe 41 armë janë sekuestruar në Kosovë. Janë ndaluar gjithsej 10 shtetas, 6 prej të cilëve më datë 11.12.2024, iu është ekzekutuar masa e ndalimit me urdhër të prokurorit”, tha Alushi.
Alushi shtoi se ky grup kriminal prej disa kohësh trafikonte drogë dhe armë zjarri nga Kosova në Shqipëri dhe anasjelltas. Sipas tij operacioni ka nisur që në muajin shkurt të këtij viti.
“Hetimet për finalizimin e dy fazave të këtij operacioni nisën në shkurt të vitit 2024, në Tiranë, pas informacioneve informative të grumbulluara nga Seksioni për Hetimin e Trafiqeve të Paligjshme, për dyshimin se shtetasi V. O., në bashkëpunim me persona të tjerë nga Shqipëria dhe Kosova, ishin të përfshirë në trafikimin e armëve nga Kosova në Shqipëri, dhe të lëndëve narkotike, kryesisht kokainë, nga Shqipëria në Kosovë”, tha Alushi.
Operacioni ka nisur nga Sektori kundër Trafiqeve në Policinë e Tiranës në muajin shkurt të 2024 kur u arrestuan disa persona që kishin trafikuar armë të modeleve të reja nga Kosova.
Pas hetimeve dhe përgjimeve Policia e Tiranës zbuloi skemën e trafikut të drogës dhe të armëve duke vendosur në dijeni ndërkombëtarët deri në finalizimin e këtij operacioni.
Ky grup kriminal trafikonte armë me autobus dhe vetura nga Kosova drejt Shqipërisë. Ndëkohë që nga Kosova dërgoheshin armë edhe drejt vendeve të BE. Hetimet kanë treguar se nga Turqia vinin një pjesë e pistoletave që modifikoheshin më pas në Kosovë./vizionplus.tv
