Lorenzo Grassini dhe Roberto Berardi, dy politikanët e Forza Italia, por edhe politikanë të lartë në vendin fqinj, nuk janë lejuar sot që të vizitojnë në paraburgim kryebashkiakun e Tiranës, Erion Veliaj.
Menjëherë pas kësaj, ata kanë publikuar në rrjetet sociale një mesazh mbështetës për kryebashkiakun.
“Fatkeqësisht, ashtu siç ka ndodhur edhe tek ne, në Itali, paraburgimi është kthyer në një problem, sepse shumë njerëz të politikës burgosen në mënyrë paraprake, për të arritur në disa zgjidhje që sot për sot, nuk na rezultojnë.“Forza Italia” është gjithmonë në favor të garancisë. Pra, në favor të kujtdo që do të duhet të provojë, deri në gjykimin e madh final, pafajësinë e tij”, tha Lorenzo Grassini, koordinator i “Forza Italia” për Ballkanin Perëndimor.
Senatori italian Roberto Berardi tha se çdo njeri prezumohet i pafajshëm deri në një vendim të formës së prerë.
“Jemi kundër paraburgimit. Këtu duket sikur jemi kthyer në kohët e Tangentopoli-t, kur abuzohej me paraburgimin. Pa folur pastaj, për atë çka mund t’i shkaktojë personit, i cili më pas mund të rezultojë edhe i pafajshëm, e që mund të mos ketë kryer asnjë vepër. Këto janë plagë që ngelin gjatë, përgjatë gjithë jetës. Po, duhet bërë drejtësi, por drejtësi të drejtë” , deklaroi Senatori italian Roberto Berardi.
“Forza Italia” mbështet kryetarin e bashkisë së Tiranës deri në shkallën e fundit të gjyqësorit,ndërsa apelojnë që Shqipëria të mos kthehet në situatën e errët të padrejtësisë.
/vizionplus.tv
