Forcohet e djathta ekstreme në Francë, partia e Le Pen siguron për herë të parë vend në senat

Partia e Marine Le Pen, Tubimi Kombëtar (RN), ka arritur për herë të parë të sigurojë numrin e nevojshëm të senatorëve për të formuar një grup parlamentar në Senatin francez.

Në zgjedhjet e fundit indirekte, RN fitoi 9 vende të reja, duke e çuar numrin e senatorëve të saj në 12. Dy vende të tjera u siguruan nga aleati i saj, UDR, duke e çuar në 14 numrin e senatorëve të së djathtës që pritet të bashkohen në grup.

Për RN, ky është rezultati më i mirë i regjistruar deri tani në Senat dhe i jep partisë përfaqësim të organizuar në të dyja dhomat e Parlamentit francez.

Zgjedhjet për Senatin janë indirekte. Senatorët zgjidhen nga një kolegj elektoral ku bëjnë pjesë deputetë, senatorë dhe kryesisht përfaqësues të zgjedhur vendorë.

Rezultati vjen disa muaj para zgjedhjeve presidenciale të Francës, ndërsa Marine Le Pen pritet të jetë sërish një prej figurave kryesore të garës presidenciale.