Një magazinë me bazë ushqimore për bagëtitë është përfshirë nga flakët në orët e para të mëngjesit në fshatin Kodër Bujaras, në territorin e Bashkisë Elbasan.
Pas konstatimit të zjarrit, shërbimet zjarrfikëse ndërhynë menjëherë për izolimin dhe shuarjen e flakëve. Në operacion u angazhua edhe Stacioni Zjarrfikës i Cërrikut, duke mundësuar një ndërhyrje të shpejtë dhe të koordinuar.
Zjarri paraqiste rrezik për përhapje, për shkak të materialeve ushqimore që ndodheshin në magazinë dhe afërsisë me zona të tjera.
Falë reagimit në kohë të forcave zjarrfikëse, flakët u izoluan dhe u shuan përpara se të përhapeshin më tej. Gjatë ndërhyrjes u arrit të shpëtoheshin dy banesa, pylli pranë zonës, si dhe një stan me bagëti.
Ndërhyrja e shpejtë parandaloi përshkallëzimin e situatës dhe shmangu rrezikun për banorët, kafshët dhe pronat përreth.
Strukturat e mbrojtjes nga zjarri dhe shërbimet zjarrfikëse vijojnë të jenë në gatishmëri për përballimin e situatave emergjente dhe mbrojtjen e jetës, pronës dhe mjedisit.
/vizionplus.tv
