Shqipëria luan sonte në mbrëmje në orën 20:45 duelin e dytë kualifikues për Kupën e Botës.
Pas humbjes 2 me 0 në debutim në Wembli kundër Anglisë, kuqezinjtë do të kenë përballë në stadiumin kombëtar Andorrën, skuadrën letër më të dobët të grupit K. Rivali ynë gjithashtu u mund në sfidën e parë eleminatore përballë tifozëve të vet 0 me 1 nga Letonia.
Nisur nga rezultati i sfidës në Londër, por mbi të gjitha nga kundërshtari që kemi përballë, e vetmja rrugë sonte në mbrëmje në shtëpinë tonë është fitorja. Skuadra është e plotë, siç e tregoi edhe stërvitja e fundit e zhvilluar në stadiumin Arena Kombëtare.
Të pranishëm me ekipin, normalisht, portieri Strakosha, por edhe Ismajli e Kumbulla, dy qëndërmbrojtësit që vinin me disa probleme fizike nga klubet e tyre dhe nuk u hodhën në fushë kundër Anglisë.
Mbetet për t’u parë nëse dikush prej tyre do të ketë minuta kundër Andorrës, megjithëse dyshja Ajeti-Gjimshiti bëri një ndeshje në përgjithësi të mirë në Wembli, pavarësisht se Ajeti bëri një gabim individual tek goli i dytë. Në krah nuk është se Silvinjo ka alternativa veç atyre që luajtën para 3 ditësh, Balliu nga e djathta dhe Naser Aliji nga e majta.
Dilemat dhe ndryshimet e mundshme që pritet të kryejë Silvinjo përfshijnë mesfushën dhe fazën ofensivë. Medon Berisha është gati për të marrë një fanellë titullari, por vështirë të kuptohet kush mund të jetë i sakrifikuari, Qazim Laci apo Ramadani.
Në pikëpyetje edhe Nedim Bajrami, që mund të zëvendësohet nga Ernest Muci, ndërsa në majë të sulmit kuotohet favorit Rey Manaj përpara Uzunit që luajti në Angli. Broja nuk ka ende mundësi të jetë shumë minuta në fushë, ndaj me gjasë mund të preferohet sërish të futet në fushë nga stoli.
Ndaj Andorrës kemi luajtur 7 herë gjithsej, duke siguruar 5 fitore, 1 barazim dhe 1 humbje. Ndeshja sonte do të gjykohet nga austriaku Sebastian Gishamer.
Dueli tjetër i mbrëmjes në grupin K është ai mes Anglisë dhe Letonisë, dy ekipe që bashkëkryesojnë me nga 3 pikë pas ndeshjeve të para.
/vizionplus.tv
