“Zemra që rrahin me pasion, për një ëndërr. Për ata që besojnë tek kjo. Në çdo rrugëtim, ku çdo frymëmarrje, çdo sakrificë është një hap më afër qëllimit, sepse kur pasioni përmbush zemrën, nuk ka rrugë të gjatë ose të vështirë. Mirëmbrëma nga finalja e Ferma VIP 2″.
Kështu nisi spektaklin e finales së Ferma VIP moderatorja Luana Vjollca.
Një fjalim i ndjerë, me mesazhe të forta, ku nuk munguan as emocionet personale, falënderimet për publikun, dhe një përmbledhje e veçantë e momenteve më të paharrueshme të këtij edicioni.
Nga dashuritë e papritura, tek komentet epike mbi fermerët, nga humori tek autoironia, Luana solli për publikun një retrospektivë, duke na kujtuar pse Ferma VIP mbetet një nga spektaklet më të ndjekura në vend.
Luana Vjollca: Për herë të parë pas shumë vitesh, unë kam emocione. Nuk e di nga se. Këto emocione do të ishin të pamundura pa suportin e publikut. Faleminderit nga zemra që na keni suportuar, ndjekur, klikuar dhe shumë mirë keni bërë që na keni kritikuar. Nuk duhet të harrojmë që duartrokitjet na mbushin shpirtin me dashuri, por kritikat na mbushin mendjen me mendime për t’u përmirësuar.
Dua të kthehem pas në kohë dhe të përhumbemi pak në kujtime. Për shembull, atëherë kur Alba pushtoi rrjetin duke kërkuar besën nën jorgan, edhe kur Limi vendosi të rendte pas saj për t’u ndarë vetëm dy javë më vonë. Kur Ester, edhe pse me dy vëllezër në shtëpi, kërkonte një tjetër vëlla. Edhe kur Nenna na shpalosi talentin e saj, në masazh. Gania, që nuk është sonte këtu, dhe programi i tij që nuk e bëri kurrë. Kur për Nur nuk ngriheshin drone, por helikopterë. Elinara dhe dashuria e saj për kafshët, por të jemi të sinqertë… edhe për Erandin.
Le të kujtojmë Albin që mirëpriste vajzat te ura me poezi, por asnjërën nuk e bëri për vete. Edhe Miss Keisi, që më shumë pati përplasje me Zhakun se sa me fermerët. Ah, është edhe Daniela me Yllin, që hynë çift dhe dolën vetëm nga kjo eksperiencë. Kuptohet, jo me njëri-tjetrin.
Kemi dhe Federikun, që në këtë finale nuk do e takoj dot mamin tim. Ronin, që më shumë e njohëm nga përmendjet që i bënte Big Mama në fermë, se sa si fermer. Dhe Albanon, që kur unë vendosa t’i komplimentoj kaçurrelat e tij, vendosi t’i presë flokët. Kam edhe opinionistët në fakt, që nuk i mora vesh kurrë nëse janë miq apo armiq.
Dhe në fund… unë, që më shumë fola për veten, se sa për të lartpërmendurit!
/vizionplus.tv
