Çmimet evropiane të energjisë elektrike u rritën në nivele rekord këtë të premte. Fatura e kësaj rritjeje i faturohet çmimit të gazit i cili pas luftës në Ukrainë dhe reduktimit të furnizimeve të Rusisë për Europën ka pësuar një rritje marramendëse.
Një e pesta e energjisë elektrike evropiane prodhohet nga termocentralet me gaz, kështu që rënia e furnizimit çon në mënyrë të pashmangshme në çmime më të larta.
Çmimet e gazit në bursën e Amsterdami, e cila është reference për Europën arritën të premten nivele rekord.
Vendet europiane janë munduar të marrin masa nga reduktimi i energjisë elektrike dhe gazit në 15%, deri tek mbështetja e shtresave në nevojë.
Bashkimi Evropian ka ndarë 236 miliardë euro nga shtatori 2021 deri në gusht 2022 për të mbrojtur familjet dhe firmat nga rritja e çmimeve të energjisë,ndërsa Republika Çeke e cila mban presidencën e BE tha se do të thërriste një samit për këtë çështje.
Nga ana tjetër ish-presidenti rus Dimitri Medvedev tha se Rusia është e gatshme të furnizojë Evropën me gaz në vëllime të kontraktuara nëse Perëndimi ndryshon qëndrim.
Sipas tij nëse Europa nuk kryen pagesat siç i kërkon Rusia ose nëse ka vonesa atëherë furnizimet do të jenë të kufizuara.
Edhe Britania e Madhe po përballet me këtë krizë teksa rregullatori i energjisë “Ofgem” tha se do të rriste kufirin e çmimit të energjisë elektrike dhe gazit pothuajse dyfish nga 1 tetori.
