Kontinenti Europian e veçanërisht pjesa jugore e tij po përjetojnë një nga valët më të nxehta edhe këtë të martë.
Shtetet si Portugalia, Spanja, Franca, Italia dhe të tjerë janë vënë në gatishmëri, ndërsa kanë marrë një sërë masash për të minimizuar dëmet shëndetësore dhe mjedisore.
Në Francë janë mbyllur më shumë se 1350 shkolla për shkak të temperaturave të larta, pasi rezultuan rrezikshme për nxënësit dhe mësuesit. Parisi ka aktivizuar alarmin maksimal të rrezikut dhe kulla Eiffel është mbyllur për vizitorët. Kryeministri i vendit anuloi të gjitha takimet për të monitoruar situatën në kohë reale.
Edhe monumenti historik Atomium në Bruksel ka kufizuar oraret për vizitorët.
Në Itali gjithashtu, disa rajone, përfshirë Lazion dhe Lombardinw, miratuan rregulla të reja që synojnë të mbrojnë punëtorët nga temperaturat rekord, duke kërkuar ndalimin e aktiviteteve në natyrë në vendet e ndërtimit dhe guroret gjatë orëve më të nxehta.
Në Genova, orët e udhëtimit falas për të moshuarit u zgjatën për të filluar më herët dhe për t’i inkurajuar ata të lëvizin përpara orëve të pikut. Autoritetet e Bolonjës raportuan një rritje prej 7% të numrit të thirrjeve emergjente.
Autoritetet spanjolle janë vendosur në gatishmëri, pasi Barcelona regjistroi qershorin më të nxehtë që nga fillimi i regjistrimeve më shumë se një shekull më parë.
Temperatura të larta po përjetohen në pjesët jugore dhe lindore të Anglisë këtë të martë, me shumë zona që kalojnë përsëri mbi 30 gradë.
/vizionplus.tv
