Për shkak të hapjes së negociatave me Bashkimin Evropian, Shqipëria do të ndryshojë ligje dhe rregulla të sektorit energjetik për t’i përafruar ato me ligjet e unionit, ku aspiron të bëhet pjesë.
Kjo sipas zëvedëskryeministres Belinda Balluku do të bëhet në bashkëpunim me Sekretariatin e Energjisë, një organ që ndihmon shtetet të zbatojnë detyrimet që rrjedhin nga Traktati i Komunitetit të Energjisë, ku bën pjesë edhe Shqipëria prej vitit 2005.
“Ne sot ndodhemi në tryezën e negociatave dhe në atë tryezë negociatash roli i Sekretariatit të Energjisë është jetësor. Është një rol i cili nuk mund të zëvendësohet dhe mbi të gjitha ne sot jemi duke bashkëpunuar për të ndryshuar edhe ato kuadre rregullatore të cilat do të na përafrojnë me ligjet e sektorit europian, por nga ana tjetër do të na ndihmojnë edhe për të përmbushur të gjitha ato kërkesa që ka agjenda e gjelbërt”, tha Balluku.
Në 20-vjetroin e Traktaktit të Komunitetit të Energjisë, Balluku theksoi edhe angazhimin e Shqipërisë për të zgjeruar më tej interkonjeksionin me vendet fqinje.
“Unë uroj shumë në këtë 20-vjetor që të gjitha vendet e Ballkanit Perëndimor të gjejnë rrugën e tyre sa më të lehtë drejt sigurimit të energjisë, nga ana tjetër sidomos përsa i përket pjesës së interkonjektivitetit që është një çështje e rëndësishme që diskutohet në tavolinat tona, por që nga ana tjetër duhet të bëjmë më shumë, ashtu siç Shqipëria tashmë është e lidhur me Maqedoninë e Veriut, me Greqinë dhe jemi duke punuar intensivisht për një lidhje nën ujore me Italinë”, tha ministrja Balluku.
Belinda Balluku falenderoi Komisionin Europian për mbështetjen e dhënë për Shqipërinë për reformimin e sektorit energjetik. /vizionplus.tv
