Kreu i një bande shqiptare është arrestuar në Dubai për llogari të shtetit italian dhe është ekstraduar ditën e sotme.
Mediat italiane raportojnë se Fation Gjonaj, kreu shqiptar i një bande të përfshirë në trafik ndërkombëtar kokaine, hashashi dhe marijuane, u ekstradua në Itali.
Sipas mediave Gjonaj dyshohet se ka vepruar së bashku me ish-udhëheqësin e Curva Sud, Luca Luçi, i cili tashmë ndodhet në burg, pasi u arrestua gjithashtu për trafik droge në prill të vitit 2025.
Ai mbërriti në aeroportin Fiumicino rreth orës 18:15 dhe u dërgua menjëherë në burg, në dispozicion të autoriteteve gjyqësore italiane. Ai ishte arrestuar më 3 qershor në Dubai.
Hetimet kundër Gjonajt filluan si rezultat i një hetimi të thelluar nga skuadra mobile e Milanos, lidhur me sulmin ndaj Enzo Anghinellit më 12 prill 2019 në Milano. Për këtë ngjarje janë dënuar në shkallë të parë si porositësi i dyshuar Luca Luçi dhe autori Daniele Cataldo.
I shpallur në kërkim që nga dhjetori 2024, Gjonaj u lokalizua në fillim të qershorit në Emiratet e Bashkuara Arabe, konkretisht në Dubai, pas një hetimi kompleks të kryer në bashkëpunim me forcat ndërkombëtare të rendit. Në kuadër të të njëjtës hetim, më 17 dhjetor 2024 dhe 4 prill 2025 u arrestuan 12 persona, përfshirë edhe Luca Luçin, i cili tashmë ishte në burg.
