Kristi dhe Aleksandër Bushgjoka, dy vëllezër të dyshuar si të përfshirë në rrëmbimin dhe vrasjen e Renis Dobrës, janë arrestuar në orët e para të mëngjesit të sotëm (19 shtator) në një apartament në kompleksin “Delijorgji” në Tiranë.
Operacioni policor, i koduar “Operacionalja 68”, u zhvillua në bashkëpunim me Forcën Speciale RENEA dhe çoi në ndalimin e tyre pa rezistencë.
Sipas hetimeve, Kristi dhe Aleksandër Bushgjoka dyshohet se kanë vepruar në bashkëpunim me vëllain e tyre Fatjon Bushgjoka dhe Petrit Çakrri, 55 vjeç, të cilët janë arrestuar më herët. Të katër këta persona akuzohen për rrëmbimin dhe më pas vrasjen e 23-vjeçarit Renis Dobra, trupi i të cilit u gjet më 8 korrik në liqenin e Ulzës, në zonën e Shkopetit.
Ngjarja e rëndë dyshohet të ketë ndodhur si pasojë e një konflikti për pazare droge në Gjermani. Sipas të dhënave paraprake, Dobra është mbytur me litar në mëngjesin e 8 korrikut, në Burrel, dhe më pas autorët kanë tentuar të zhdukin trupin duke e hedhur së bashku me automjetin në liqen. Megjithatë, trupi i viktimës ka dalë nga makina gjatë rënies së saj në ujë, duke çuar në zbulimin e krimit.
29-vjeçari Kristi Bushgjokaj dhe 24-vjeçari Aleksandër Bushgjokaj janë të dyshuar për veprën penale “Rrëmbimi ose mbajtja peng e personit”, kryer në bashkëpunim.
Ndërsa vëllai i tyre 31-vjeçari Fatjon Bushgjokaj dhe 55-vjeçari Petrit Çakrri janë arrestuar për veprat penale “Vrasja me paramendim”, kryer në bashkëpunim, dhe “Rrëmbimi dhe mbajtja peng e personit”.
Këta dy të fundit më 19 Korrik janë transferuar në paraburgimin e burgut 313 në Tiranë pasi nuk mund të dërgoheshin në Burrel, për arsye se mund të ketë të afërm të 23-vjeçarit Renis Dobra që punojnë në institucionin e burgut të sigurisë së lartë të qytetit të Burrelit.
Njofitmi i policisë:
Gjatë 24 orëve të fundit, finalizohet nga Drejtoria e Forcës së Posaçme Operacionale, një tjetër operacion për kapjen e shtetasve në kërkim ndërkombëtar dhe kombëtar.
Operacioni policor i koduar “Operacionalja 68”, u zhvillua në bashkëpunim me Forcën Speciale RENEA.
Kapen në Tiranë dhe vihen në pranga 2 vëllezërit e njërit prej autorëve të vrasjes nëpërmjet strangulimit, të shtetasit R. D., më datë 08.07.2025, në Burrel.
Të arrestuarit, të dyshuar si bashkëpunëtorë për rrëmbimin dhe mbajtjen peng të shtetasit R. D.
Në vijim të punës për lokalizimin, kapjen dhe arrestimin e shtetasve të shpallur në kërkim ndërkombëtar dhe kombëtar, shërbimet e Drejtorisë së Forcës së Posaçme Operacionale në DPPSh siguruan informacion për vendndodhjen e 2 vëllezërve të shpallur në kërkim.
Bazuar në këtë informacion, u organizua dhe u zhvillua në bashkëpunim me shërbime të Forcës Speciale RENEA, operacioni i koduar “Operacionalja 68”, për kapjen e tyre. Gjatë operacionit, shërbimet e Policisë kapën në një apartament në Tiranë dhe ndaluan shtetasit:
-K. B., 29 vjeç dhe A. B., 24 vjeç, vëllezër.
Këta shtetas ishin shpallur në kërkim bazuar në vendimin e Gjykatës së Shkallës së Parë të Juridiksionit të Përgjithshëm Dibër, si të dyshuar për veprën penale “Rrëmbimi ose mbajtja peng e personit”, kryer në bashkëpunim.
Nga hetimet dyshohet se 2 të ndaluarit, në bashkëpunim me vëllanë e tyre, shtetasin F. B., dhe me shtetasin P. H. alias P. C., 55 vjeç (të arrestuar për veprat penale “Vrasja me paramendim”, kryer në bashkëpunim, dhe “Rrëmbimi dhe mbajtja peng e personit”), kanë rrëmbyer dhe mbajtur peng shtetasin R. D., 23 vjeç, trupi i pajetë i të cilit u gjet në liqenin e Ulzës, Shkopet.
2 shtetasit e kapur iu dorëzuan Drejtorisë Vendore të Policisë Dibër, për veprime të mëtejshme.
/vizionplus.tv
